新股一隻接一隻上市，完全無視個市鬼咁靜，小初真係要講個服字。上星期掛牌嘅華豐環保紡織（364）叫做企喺招股價樓上，今日又有隻做產銷珠寶嘅明豐珠寶（860）掛牌上市。
目前嘅潮流係圍唔成飛都唔會上市，明豐唔會例外。經紀黃話，隻股係由家陣當紅嘅金利豐做保薦人，但圍飛一事就與佢無關，基本上都係來自寶島嘅投資者自己搞掂晒。
明豐今次發售1.82億股，每股作價36仙，有新股又有舊股，中間原因睇怕都唔使解釋。根據過往寶島資金炒作新股嘅經驗，頭兩日應該會好熱鬧，但估計初段時間會有唔細沽壓，皆因有唔少炒家收到風入咗飛，佢哋有得執就一定賺咗先。
另外，掛牌冇耐嘅滙創控股（8202），除咗上市第一日之外，股價一直係咁升，最高見過41仙，噚日就平收38.5仙，但個棚仍然搭得好厲害。經紀陳話有關人等已經散咗少少貨出街，但唔知夠回本未。
慕容小初