電視台有位姐仔，人稱「逢人電」，佢𠱁男人真係極度本事，早排佢拍咗一套電視劇，即刻電到個老實小生暈陀陀。姐仔並唔係貪個老實小生嘅名利，而係貪就手，等佢拍劇嘅時候有多個觀音兵效勞。
不過個老實小生就儍咗，竟然為咗個「逢人電」，差啲同佢嘅女友分手，好彩拍完劇之後，姐仔即刻飛起老實小生，個小生至識回頭是岸，搵番嗰個被迫退出樂壇嘅女友。
其實「逢人電」除咗老實小生外，之前都有唔少前科，搞到個男人同老婆陷離婚邊緣。其實「逢人電」幾有潛質，但如果佢咁搞落去，遲早搞到自己形象差晒，自毀前程。
藤原紀香呢幾日喺台灣做宣傳，難免會俾人問起佢同郭富城以及加藤雅也嘅緋聞，紀香開頭都話感情係私人事唔肯講，點知到記者窮追猛打下，佢就話：「Iamhappy.」再問紀香同城城究竟有冇可能，佢一樣係話：「Iamhappy.」之後陸續所有有關感情問題，紀香都用呢句做標準答案，唔知紀香係口密，定係真係同兩個男人都相處得咁開心？
不過，問到紀香鍾意乜嘢類型嘅男人，佢話要眼睛有神同有活力，外表冷酷內裏熱情，城城同加藤雅也都好符合標準。再問佢想唔想結婚，三十歲嘅紀香話結婚重有排，不過佢就好想去蜜月旅行，因為佢發現咗以前戴安娜王妃度蜜月嘅地方，好浪漫好想去喎。
姐仔同細過自己嘅圈中男友拍拖，係人都知男嗰個使緊女友嘅錢，難得女嗰個唔介意。其實一直有傳聞男方係鍾意男人嘅，重話以前出價五千蚊，男方就肯除褲，傳言有幾成真馮仁昭唔敢講，但女方陷入呢段感情表現得有啲不能自拔，馮仁昭都有啲替佢擔心，希望佢清醒啲啦！
本報之前有個娛樂版記者甘比俾大劉賞識後，忽然富貴起嚟，另外佢之前同周星馳又傳過緋聞，聽聞南燕覺得甘比嘅經歷好傳奇，所以想開拍部《甘比傳》。馮仁昭前晚打過電話畀南燕，佢話：「我係覺得甘比嘅古仔幾有趣，有諗過拍，但除非搵到甘比做啦！如果唔係根本冇開嘅價值，𠵱家以甘比咁嘅環境佢又點會做，所以開拍《甘比傳》，都係講吓笑啫！」
言承旭早前同大S徐熙媛喺西班牙拍攝《流星花園II》一場接吻戲，大S竟然覺得「好害怕」。
大S話拍《流星花園》第一集，佢拍到同言承旭嘅感情戲時，都有好甜蜜嘅感覺，但後來佢同台灣藝人藍正龍拍拖後，雙方約法三章，盡量避免拍親熱戲，所以今次大S錫言承旭時，總係有所避忌頻頻NG，佢重話：「當時氣氛很尷尬，我想言承旭應很想砍我吧。」而言承旭不怒反笑說：「這個杉菜不太專情，跟我在一起，心中卻想着別人。」
孫佳君噚日同陳嘉玲同一名女友人去金鐘太古廣場間Cova食午飯，不過孫佳君要趕住傾劇本，所以先行離開。講到有乜嘢新工作，孫佳君就話：「我𠵱家去傾劇本，但係詳情未透露得住。我之前就接拍咗一個纖體用品嘅廣告，大約九月中會出街，酬勞方面都唔錯㗎。」可能有新工作關係，噚日孫佳君嘅心情非常靚，臨走前重同身邊人講拜拜㖭。
電影《買兇拍人》嘅演員方子璇同張達明，噚日喺尖沙嘴出現，達明好勞氣咁講起：「近排行街，見到隻VCD叫《買兇拍淫》，封面啲設計抄足我哋套戲，但就講fing頭，唔知重以為我自己畫粗咗條眉拍嘅！」其實有人抄即係好嘢嚟嘅，佢哋應該開心至係，而導演彭浩翔重話會拍續集㖭！
一個嫁咗富商嘅女藝人，表面上都幾風光，得閒就攞啲珠寶畀傳媒影吓，晒吓幸福，但其實佢個老公係空心老倌一名，女藝人都係結咗婚先至發現，但生米已經煮成熟飯，惟有喺人面前扮恩愛。而女藝人話係老公送嘅珠寶，其實係之前佢嘅男友送嘅，佢咁做似乎冇理吓佢以前嗰啲男友嘅感受。
有位年輕靚仔歌手嘅老竇呢輪好唔掂，銀行勁追佢卡數，佢老竇表面上好似做大生意，但實際錢銀就唔多鬆動，年輕歌手初時見老竇送嘢畀佢嗰陣咁大方，真係冇諗過阿爸咁唔掂，後來佢阿爸開到口叫佢幫手，佢先至如夢初醒，佢兩父子感情唔錯，所以下半年個年輕歌手會好努力接嘢做，希望喺錢銀上可以幫番老竇。