夏佳理一上任做馬會主席，就要面對開鑼日投注額大跌一成嘅局面。噚日佢被記者問起，好輕鬆咁話，通常馬迷開鑼時未了解馬匹狀態，先會保守啲落注，重叫大家樂觀啲。傾傾吓，夏主席忽然摷咗張投注飛出嚟畀大家睇，原來佢前日小敲買中嘅一百蚊連贏。當日第五場佢落注四隻馬：三、五、七、八號四穿六，每十蚊派彩三百幾，咁就收三千幾，重未得閒去領取派彩。
不過，佢話全日埋單計數，最後只係得千幾蚊落袋。唔怪得記者問到佢有乜必贏貼士，佢口快快講咗句：「唔好賭囉！」馬會主席真係叫人唔賭？夏佳理好醒目，馬上再補充，自己嘅贏馬竅門，在於好少買熱門馬，專揀半冷門以小博大。八方可惜自己受教得遲，尾場竟然用咗佢隻「先河」做膽。
講起「先河」，夏佳理話自己從來唔買自己嘅馬，因為贏出已經有獎金；一旦跑唔出，重要輸多幾百蚊賭注就更加嬲。不過，夏主席坦言對前日只係跑第三嘅「先河」有啲失望，佢話做馬主都要講運，有時買入一隻馬時以為佢好好，事實上未必咁理想。
傳真︰2623-9278
電郵︰