蘭西最近聽世紀21安興（將軍澳）分行講，將軍澳慧安園有個車位，二十一萬成交，由於好少提到車位買賣。所以蘭西又向美聯攞咗啲個案研究吓，發現將軍澳嘅車位成交價一般都係二十幾萬一個。
不過，二十一萬呢個價錢都好似係近期低位。係咪同地鐵通車之後多咗人改搭地鐵，搞到車位要平賣，就不得而知。
另外，近期啲車位成交，最貴嗰個原來喺花園臺，7月24日有一宗雙車位登記，作價一百萬，即係話每個值五十萬。嘩！五十萬呢個價，喺新界已經可以買到一個細細哋嘅二手單位。不過，因為花園臺單位都要千幾萬，車位價錢係碎料啫，住得咁大間屋，睇怕都唔止有一部車啩！
中山星晨花園今年啱啱十周年，慶祝活動特別多。中秋節將舉辦「星晨花園濃情十載中秋跳傘表演嘉年華」。屆時有解放軍八一空軍表演花式跳傘（聽講係由市政府出面邀請），晚上有攤位遊戲、特色美食、歌舞雜技同花燈晚會等，節目好豐富。晚會名額就只有二千五個，但星晨花園逾五千伙，加上中秋當日係星期六，到時一定人山人海。聽講話，發展商可為報咗名嘅業主安排船票，服務認真周到。
利嘉閣近期好出位，早排就話罷做馬灣珀麗灣入票一日，而近日刊登嘅豪宅廣告又零舍唔同，啲文字打橫擺，讀者要擰橫份報紙嚟睇。利記董事總經理何紹章同蘭西講，此舉係希望有與別不同嘅效果，可提高收視率。何生透露，配合公司加強豪宅部嘅政策，呢方面嘅廣告費用大大增加兩成。
寫字樓租金持續下跌，市況再次轉靜，業內人士話，大業主嘅出租策略已經轉變。以前為咗保持面價唔跌，大業主都會畀長啲免租期，以免其他租客續約時都要求減租。
今時唔同往日，大家都睇唔通後市，明知約滿後都做唔番𠵱家個價，不如實際啲，索性減價。所以，近期寫字樓租務成交嘅免租期都唔係好長。
中原新一期《中原天地》，有篇文章話施永青進軍傳媒。蘭西嚇咗一跳，睇完先知，原來同商報屬同一集團嘅《深圳特區報》，喺深圳搞咗本《置業》雜誌，深圳中原就做顧問，即係提供資料，定期供稿咁解。
呢本書仔每月出一次，暫時發行咗兩期，除咗喺中原嘅分行有得攞之外，深圳都有得賣，每本五蚊。中原咁落力，當然係爭取曝光率，希望對生意有幫助。
施老闆一向鍾意寫文章，以前喺報紙寫過專欄，𠵱家中記嘅網頁都有佢嘅專欄，話唔定佢忽發雅興，寫埋稿畀呢本雜誌，評論吓內地樓市。
蘭西
電郵地址：