大市日日咁跌，已經跌到第7日，且慢跌後又轉為急跌，噚日恒指就失掉146點，係前周五第一日急跌178點以來嘅第2大紀錄，成交繼續縮，只得41.5億元，大戶、莊家同小戶，一個面口，冇晒表情。
大行繼續攞大藍籌開刀，主力自不離滙豐（005）同中移動（941），不過，佢哋都「玩」得好「神化」，時而質低幾個位，時而掃番高幾個位，尤以中移動最為顯眼，在21.0元水平，爭持得好激烈，特別係收市一刻，又掃又質，剩係嗰分零鐘，都成咗過百萬股，結果收21.1元，雖然跌咗0.45元，但總算由低位20.8元彈番3個位。
滙豐「戰情」就冇咁激烈，地產股雖然有滙豐證券「品題」，但沽家一樣冇面畀，照質如儀，新地（016）大弱勢，50元大關失守，大跌0.9元，長實（001）亦唔見咗0.75元。
恒指噚日最低9861，剛好去到8月7日上升裂口（9783-9851）之上就反彈，只要唔補番個裂口，形勢重未算太壞，回升上10日同20日線的機會仍然存在，不過，暫時唔適宜對市勢有太大期望，短期即使守得住，都係橫行居多。
噚日國企股幾硬淨，兗煤（1171）、上海石化（338）同埋兩隻石油股都有好表現，至於電力股亦屹立不倒，睇走勢，3隻電力股，華能國際（902）、北京大唐（991）同山東國電（1071）都造緊小型頭肩底，短線可以睇好。
以華能為例，由8月開始形成頭肩底，目前在營造右肩過程中，頸線在6.0元水平，若破位而上，量度升幅目標6.6元，中線有機會重見7字頭。
今年上半年，華能營業額78.6億元（人民幣．下同），上升5.4%，獲利17.8億元，升14.1%，每股盈利30分。下半年，煤價回軟有利降低成本，而利息開支亦會維持在低水平，估計盈利會有再進一步表現，以全年每股盈利64分計（折60港仙），PE12倍計，股價可見7.2港元。
華能受惠電力業改革，預期明年會再進行收購合併，對股價會帶來支持。
郭兆誠