環球新人麥浚龍（Juno）前晚在新城台慶show打頭陣表演，成為焦點，祝酒時他亦站於中間重要位置，地位凌駕樂壇天王天后如劉德華和陳慧琳等人。
陳慧琳（Kelly）、黎明、劉德華、任賢齊、許志安、李克勤、容祖兒、Twins、梁詠琪以及眾新人如Cookies等前晚往灣仔會展，出席慶祝新城電台台慶的「新城台慶觸發表演夜」音樂會。新城特別安排一眾新人作開場表演，其中環球新人麥浚龍（Juno）突圍而出，打頭陣出場，而在音樂會尾聲舉行的祝酒儀式，Juno一直站於中間位置，地位超越樂壇天王天后，成為焦點人物。
新城解釋Juno打頭陣演出，是因為歌手出場次序取決於誰先報名，由於Juno所屬的唱片公司率先為他報名，故他可以優先出場。
Juno被問到李克勤大前晚在音樂會上再次與好友梁榮忠暗寸他，Juno前晚說：「咁咪好囉，佢咁講即係抬舉我，我一直都唔覺得克勤嘅說話有敵意，我會當係一種讚美。至於話公司簽我之後多咗幾千萬，就可以證明我可以幫公司賺到錢。」
而與Juno父親麥紹棠有官司瓜葛的劉德華前晚表演完畢，落台時Juno主動上前與華仔打招呼，Juno說：「我當見到前輩咁，而且見到面打招呼係一種禮貌，我頭先見到佢就話『Hello!華哥』，咁佢都有叫我努力啲。」
對於Juno主動上前打招呼，問華仔會否覺得Juno借他宣傳，華仔說：「見到傾幾句，呢啲睇人哋點睇，傾幾句冇所謂啦。」再問華仔為何表演完畢即時離開，華仔解釋說：「話明係神秘嘉賓，梗係曇花一現㗎啦。」
採訪：王連連、李珮洳
攝影：林德雄、黃文成