日本豐田旗下嘅LandCruiser車系，有另一分身嘅Prado系列，自1990年推出至今經已踏過11個年頭，而廠方有計劃響今年年底前，推出第3代Prado新車，響廠方仍未正式向外公布前，我哋《車天車地》版卻取得第一手新車資料，究竟嚟緊Prado有幾大變動？我哋不如嚟先睹為快啦！
特約記者：張以中
新車售價：約港幣36萬起
查詢：富利堡汽車（28776700）
據日本資料所知，新款Prado單係尺碼經已較舊款（4690×1820×1880mm）為大，惟車高卻下調25mm，尺碼為4715×1875×1855mm，軸距亦有115mm裨益，數字為2790mm，兼且離地距亦下調咗10mm，僅有220mm高，給新車有低重心，有較安全操控之餘，重方便進出一般室內停車場㖭！全新Xenon頭燈，匹配粗獷嘅鬼面罩組合，重帶出點Harrier嘅野性美，而中置直立式尾燈編排，卻較前富安全度。
新一代Prado沿用兩台分別3.4公升V6DOHC及2.7公升直4DOHC偈組合，惟陣架式車體結構突出之餘，高級版有高扭力恒式四驅選擇外，重有電子避震軟硬調校，以及液氣壓式車高操控；難得新車重有取材自英國越野路華嘅DAC（DownHillAssistControl）下坡安全控制系統，令全天候個性因而提高㖭！
新Prado除三門版外，五門三排八座位設計會係主打車款；除具備城市SUV嘅多變個性外，三排座椅既可組合成卧鋪，遇有需要時更可將中、後排收摺之餘，後排座椅更可索性取走，令尾廂容量倍增。難得表板陳設剛性中帶出點High-tech味，予人有濃厚時尚感㗎！