消費BestBuy：
日本瑞士靚表開倉低至二折

之前介紹過嘅手表開倉，都以OL、小朋友、男士運動表為個別主題，唔可以一次過掃晒唔同嘅表款，未必符合貪心人嘅要求。所以今次小記搵嚟嘅手表開倉就有齊鋼帶男裝表、晶石女裝表同可愛米奇表，完全照顧唔同階層嘅需要，全場過千隻日本、瑞士靚表任你掃。至特別係買滿$1,500開倉表，就即送你超硬林寶堅尼手表一隻，買平表之餘，再送貴表絕對罕有。
記者：張穎倫
攝影：周旭文
ImageGirl：Don、Kiji、豆豆

女裝要閃
揭蓋玩石高貴又夠In
自從表壇新貴OfficinePanerai今年出咗首隻揭蓋表之後，表界已慢慢步入揭蓋表時代。好似呢隻嚟自日本嘅Francois水晶表，一樣選用揭蓋設計，而且表款亦勁似CHANEL嘅鑽石表。雖然佢唔係用真鑽，但一樣鑲滿SWAROVSKI嘅水晶，貴氣十足，女生必冧！
貨量：50
街價：$3,300
開倉價：$990

磨砂表殼重量超輕
如果你重視內涵多過外形的話，不妨選擇呢款瑞士女裝G.M.T手表，皆因佢嘅表面上只得3、6、9字樣，襯埋磨砂銀色表殼，夠晒簡潔。最正係佢採用鋁質製造，令表身非常之輕，全表只重28g，比其他金屬輕一大截，但硬度卻直逼唔少鋼表。另一方面，全套表共有4色皮帶附送，就算日日玩唔同色都冇問題。
貨量：50
街價：$3,200
開倉價：$980

長方表面瑞士晶石
若嫌玩揭蓋嘅Francois太過誇張，唔啱返工戴的話，呢隻同樣來自日本嘅Unique就收斂好多。款式有啲似PATEKPHILIPPE嘅長方形表面，除咗表面鑲有60粒瑞士晶石外，表框亦同樣鑲滿晶石，再襯番Colourful嘅真皮表帶，名貴得嚟一啲都唔老餅。開倉優惠更送多一條表帶，有紅、藍、綠、紫等多色選擇。
貨量：50
街價：$3,200
開倉價：$880

純鋼表帶　水晶表面
近排喺地鐵大賣廣告嘅MONTANA繼續堅持法國設計、瑞士製造嘅CrossOver形式，令佢喺香港愈嚟愈多Fans。呢期至多人捧場，首選係呢款純鋼蝴蝶形表帶嘅款式，除咗以全鋼製造外，更配以水晶表面，最特別係選用較罕見嘅蝴蝶形表帶，睇落典雅富新鮮感。
貨量：50
街價：$3,800
開倉價：$2,000

男士必掃
鋼帶Golf黑面三圈設計
呢隻日本嘅鋼帶Golf，絕對係煞食之選。只要一拎上手，就會發現佢嘅鋼帶份量十足，質感絕非一般千零蚊嘅貨色可比。另外，雖然佢唔係DAYTONA，但一樣有煞食嘅黑色表面同三圈計時設計，更玩埋monogram圖案，集齊靚表元素於一身。
貨量：50
街價：$3,200
開倉價：$760

透明自動表一覽無遺
鍾意玩表嘅朋友都會對透明手表大感興趣，貪佢可以睇清睇楚每個齒輪、機件嘅轉動情況同運作是否暢順，極之有滿足感。不過市面上嘅透明表都以電池表居多，所以呢隻Golf嘅透明自動表就特別矜貴，再襯埋羅馬數字，特別有風味。
貨量：50
街價：$2,800
開倉價：$450

卡通款啱小朋友
米奇電子表響鬧任校
今次開倉連小朋友都照顧埋，好似呢款米奇老鼠電子表，有齊響鬧、背光及計時全套功能，最啱小朋友Set定放學時間，又或者體育堂計吓自己跑得快唔快。值得一讚係膠表襯上尼龍表帶夠晒活力，同場亦有紅、黃、白、黑等顏色任擇。
貨量：100
街價：$180
開倉價：$100

光能充電表　夜光最得意
呢款表雖然主打米妮做主角，唔啱男仔戴，但佢嘅光能設計就極之好玩。只要將充電表的掹走，並照在太陽或燈光之下就可以為佢充電。完成充電之後，唔單止可成為推動能量，而且更可以產生夜光作用，令表面上嘅心心同花花不停閃吓閃吓，極之好玩得意。
貨量：100
街價：$180
開倉價：$100

買滿$1,500送林寶堅尼手表
講到鋼水硬淨，好多人都知道IWC同ROLEX嘅手表十分厲害，但其實林寶堅尼嘅手表更係有過之而無不及。事關佢用嘅鋼材同林寶堅尼跑車嘅迫力碟都係同一種物質，試諗吓可以制止Diablo、Murcielago等600匹狂牛嘅物質絕對硬得誇張，所以佢嘅手表絕對硬得驚人。𠵱家只要買滿$1,500就即刻送你林寶堅尼手表一隻，而且男女裝任揀，絕對係全港首次，不過數量有限，送完即止。
貨量：男、女裝各100
街價：約$2,000

開倉資料：永昇名錶行（25777197）
地址：北角屈臣道2-8號海景大廈A座1101室
開倉日期：即日起至9月15日
營業時間：10:00am-7:00pm