九月第一個交易日，恒指下跌146點，收9896，暫時守在8月7日裂口9581至9782之上。不過恒指MACD跌穿訊號線，技術上進一步利淡，跌勢可能轉急。
恒指Put輪較多人玩有3隻，9205噚日升3成最勁，但9月27日屆滿，溢價1.48%則嫌稍高，槓桿率近22倍，大上大落啱晒搏命，趙飛雲怕太刺激，所以唔會掂。9287噚日升18%，收0.177元，溢價1.42%，槓桿率縮至13倍，上落冇咁大，但10月中到期，時間值遲吓會縮得頗快，所以就算睇淡後市亦會逐漸轉至9444，隻輪明年1月30日到期，溢價6.5%，槓桿率13.3倍，年期長，唔怕短期會大縮溢價，玩得安心啲。
噚日藍籌股中表現最差係電盈（008），大跌5%，收1.33元。經紀老友話，有句俗語「九唔搭八」，8號仔同9字唔夾，喺9月份梗係冇好日子過。但趙飛雲記得舊年9月份電盈非常威，公布業績後升足2個月，最高見過2.60元，所以問題肯定唔係咁，而係業績唔掂。
電盈早前出售流動電話業務畀Telstra，損失2.32億美元，有證券行估計電盈上半年會錄得6億元虧損。早前高盛話電盈見1.30元才有支持，但相信一般投資者都唔會再掂佢。「哀莫大於心死」係電盈小股東嘅寫照，其實唔少人都當持有嘅電盈係totalloss，唔好話升跌5%，就算升跌100%都唔會有太大反應。
趙飛雲