港股噚日在電訊股拖累下，恒指跌破10000大關，收報9896，跌146點，成交41.5億元。後市重要面對新一季盈富基金（2800）出售，及中國電信抽水活動，認真唔易捱。其實港股日日得40至50億元成交，已經乾到難以再乾，重邊到有水俾人抽呢？
電盈（008）噚日跌近高盛目標價1.30元，收報1.33元，跌5%，成交7579萬元。電盈市值降至306億元右左，除咗市值銳降，電盈重要瘦身裁員。電盈弄至如斯田地，除咗因為李澤楷當年蛇吞象之外，亦與電管局在開放電訊市場上，對電盈有頗大影響。電管局95年為固網引入競爭至今，只得和記比較肯落本鋪網外，其他兩間一味靠租香港電訊固網來經營，令香港電訊盈利被侵蝕，但卻未有為電訊業製造可觀職位數目，吸納香港電訊裁減出來嘅員工，呢種盲目開放市場政策，根本對香港經濟冇好處。
電盈市值就算跌到不足100億元，最多都係苦了股民，但政府若不出招，迫使其他固網商加快建網，增加就業機會，刺激香港經濟，則電盈股民利益之犧牲就係白費。阿虎唔要求港府可以製造雙贏局面，但也不要製造雙敗局面。
慶豐金（501）停牌前股價已經有少少腳軟，但幕後人士仍力撐至停牌，宣布再發可換股債券。當發債大功告成後，復牌後偏軟，噚日股價大幅下瀉35%至2.4仙收市，成交達4423萬元，成個斬倉格局。有傳聞話慶豐金可能會將股份合併，讓股價有更大下跌空間，所以嚇親部份有心人士出貨。
阿 虎