曼聯中場堅尼喺上個禮拜六對新特蘭時又忍唔住火，向對手嘅麥卡迪亞動粗，搞到領咗職業生涯第十面紅牌，重會面臨停賽三場嘅處分。之但係，如果要罰嘅話，麥卡迪亞都應該有份，事關若然唔係佢撩㷫堅尼，堅尼未必使俾球證趕出場。
堅尼向麥卡迪亞郁手當然係唔啱，被罰出場可說係咎由自取，但如果球迷有留意場波嘅話，應該睇到麥卡迪亞喺事發嗰時，曾經用啲有諷刺意味嘅動作，嚟回應堅尼喺自傳中對佢嘅批評。就算麥卡迪亞係受害者，但換一個角度嚟睇，佢係蓄意向堅尼進行挑釁，所以如果英足總係明察秋毫嘅話，應該連佢都要罰埋。
講番曼聯，係人都知佢哋𠵱家有史高斯同畢特養傷，如果連堅尼都停埋賽，條中場線就變得天殘地缺。睇嚟領隊費格遜真係要好好同佢傾吓，事關佢再係咁落去，遲早會拖垮隊波。
羅馬喺整個夏天無幾多個收購，教練卡比路喺轉會市場關閉後發晦氣話：「我好想攞聯賽冠軍，但睇住其他勁旅買完一個又一個，而球會連戴維斯都買唔到畀我，睇怕我哋頂多攞第四！」聽講呢番話令佢同會長辛斯嘅關係惡化，可能有下文。
最近表現麻麻嘅烏克蘭，為咗可以喺禮拜六對阿美尼亞場歐洲國家盃外圍賽攞到好成績，特登選咗𠵱家養緊傷嘅舒夫真高入隊，希望藉此嚟振奮一吓球隊士氣。之但係，唔係我求大俠現實，所謂重賞之下必有勇夫，想啲球員踢好啲，不如畀多啲贏波獎金佢哋好過啦！
我求大俠收到讀者嘅投訴，話收費台某位英超嘅賽事評述員太過偏激，講到直頭過咗火位。講真呀，佢身為賽事嘅評述員，就算見隊波踢得幾咁差，都應保持中立態度，唔好放太多私人感情落去；重有就係佢用「垃圾」去形容列斯班波，若然你係支持列斯嘅，你話唔哽耳就假嘞，跟住睇到列斯又有中柱中楣波，簡直火都嚟埋。
賽前估計中國籃男會喺世錦賽分組賽輸畀美國四十分以上，結果只係輸十九分啫，重曾經領先過，認真唔失禮。話時話，美國夢幻隊一隊不如一隊，就連姚明（圖）賽後都話呢支夢幻隊不外如是，重有信心喺NBA立足咁話！我求大俠都覺呢支夢幻五隊唔多似樣，隨時驚夢散㖭！