上周五美股杜指大部份時間係威係勢，接近尾段曾高見8783，最多升過112點，當時趙飛雲十分擔心大戶可能趁今日美國冇市，兼且港股成交淡薄而借勢挾淡，倉內嘅恒指Put輪9287可能要輸鋪勁，好彩杜指尾段回吐甚急，最後倒跌7點收場，收8663。
杜指上周五先升後跌，反彈無功後。技術走勢進一步利淡，中線技術指標MACD亦出現轉弱迹象，MACD線輕微跌穿訊號線，若趨勢確認，則美股今次升浪可宣告結束，展開調整，港股亦難免受影響。
恒指今次追隨美股反彈，走勢明顯落後杜指，恒指MACD升至0線已經受阻回頭，不過MACD線則仍未跌穿訊號線，若進一步跌穿，則確認轉淡，短期會先考驗8月7日上升裂口9851至9782支持，若連8月6日低位9632亦失守，則反覆下試去年911事件低位8894，但相信除非有特別利淡消息出現，估計恒指9632應不致跌穿，繼續營造9600至10500的上落區橫行。
趙飛雲上周偷步買入恒指Put輪9287，目前仍要輸些少，9287將於10月15日到期，重有唔夠個半月壽命，屬於短命輪，只宜炒超短線。行使價10500，屬價內輪，溢價1.7%，槓桿比率16倍，數據尚算合理，但若見溢價太高，例如高於2%，則宜沽不宜買，除非確認恒指短期有大跌機會。
趙飛雲