有隻創業板股份叫做艾克國際（8179），最近佢個勁抽股東英特爾一次過減持好大手貨出嚟，股價因此波動過一輪，艾克上周五微跌1.82%，收16.2仙。
經紀陳話，艾克股價稍後可能重有波動，皆因咁大手貨，友好人士未必咁易啃得晒。
艾克業務主要係設計軟件，特別係做客戶關係管理軟件。上市差唔多有10個月，初期隻股最高做過70仙，但冇幾耐就被來自寶島嘅order係咁沽，跌到家陣十幾仙，可想而知沽盤有幾勁。
英特爾喺上星期，一次過就減持咗11.95%，但作價就唔清楚，公司淨係話有位股東接咗貨。
之後兩日，艾克突然出現一手為數1920萬股，造13仙嘅非自動對盤成交，股價跟住即刻抽上去最高18.9仙，事後先知係嗰位股東減持。但睇番呢幾日嘅成交，成交疏落兼買賣盤隔格離行離列，似乎有排都未散得晒。
慕容小初