向以車種多變化，予人有不同選擇嘅日本豐田車廠，早前又推出一款名為SucceedWagon嘅多用途RV，雖然賣相唔算好突出，但勝在有齊原廠配套設備，重有Modellista為佢度身訂造嘅大包圍，加上闊落實用嘅尾廂，大有新一代CityRV風範㗎！若然有興趣的話，不妨留意吓有無車行引入喇！
特約記者：何仲恩
新車售價：約港幣15萬起
查詢：歐日汽車（26201010）
雖然車廂實用性較高，惟向以懂得包裝嘅豐田，亦落咗唔少心機；三幅式軚環夠活力外，中控台兩旁重有開放式儲物匣，而中控台下方重置有活動桌几同杯座㗎！除四門電窗、門邊電鏡同中央門鎖外，少不了重有原廠冷氣同音響配搭，唔少得重有雙安全氣袋㖭！
呢部SucceedWagon主打係一台取材自Corolla嘅1.5公升直4偈，既有兩驅又有四驅配搭，底盤用上前麥花臣支柱同後扭力連桿組合，加上本身低重心設計，有唔錯循迹表現之餘，重有ABS連EBD裝置，制動表現亦見不俗呢！
呢部以方匣子造型出現嘅SucceedWagon，雖然外觀較平實，唔似得同廠嘅CorollaWagon咁突出，但相對於車廂嘅實用性，卻高出好幾倍，絕對有CityRV嘅個性㗎！