高官退休後加入私營機構已成慣例，今個月又多一個。舊年年底退休嘅運輸署前助理署長呂崇義﹙圖﹚，轉頭就加入威信集團做執行董事。
威信業務全部同運輸有關，除咗停車場，重有隧道管理同快易通；最近又以黑馬姿態，喺運輸署嘅公開招標之中成為大贏家，獲准開辦兩間駕駛改進中心。八方啲老友話，真係有啲瓜田李下。不過，聽講公務員事務局已經批准呂崇義出任新職，重話經已考慮過有無利益衝突㖭。
呂崇義喺運輸署裏頭出名英俊靚仔，今年五十四歲，七二年加入政府，由運輸主任做起，真係半生青春送畀運輸署。唔少屯門居民應該記得佢，喺九五年屯門公路塌石要全線封路嗰陣，佢在記者會上一時失言，話封路係天意，引起好大風波。聽講，此後佢每逢聽到天意兩個字，都有陰影。
傳真︰2623-9278
電郵︰