家陣發展商賣樓真係要勞心勞力，親力親為，重要係少啲演戲細胞都唔得，因為要成日做秀（show）去𠱁買家落叠，而對象已經到咗大小通吃嘅地步。
新地Eric周國賢噚日就扮幾分鐘雪糕佬，親手製作雪糕甜筒，派畀各大小參觀者同老記解暑，佢大哥啲手勢認真麻麻，圖中畀小朋友嗰個算係整得最好嘅喇。聽講架雪糕車未來兩個星期都會喺愛琴海岸周圍行，想食免費雪糕就要留意。
另外，新地亦租咗架舊款嘅Dennis牌觀光巴士，定時行走愛琴灣載客路線，噚日Eric周就專登為呢架巴士啟動剪綵。
另外，距中秋節重有廿日，南豐在荃灣翠豐臺就率先送月餅，睇樓人士入場就有一個，餅盒上除寫有樓盤名字，重有一句「月到中天萬國明」，除了寓意家家戶戶慶團圓外，蘭西估計會否隱喻樓市到中秋就一天光晒？都係要等高人解畫至得。當然，除月餅外，重有南豐賣樓特色產品，電子念佛機一部，喃嘸觀世音菩薩，唔知對打救樓市有冇幫助呢？
近排賣嘅新盤大部份坐落新發展區，四周圍沙塵滾滾，層樓面前空地隨時起一大堆樓，廣告賣嘅景觀都唔知可以睇幾耐。而今時今日嘅買家，愈嚟愈醒目，除咗問付款法、物業詳情之外，都會關心埋附近嘅規劃。好多發展商為應酬佢哋，充其量會用一張自家畫嘅地圖去解釋，準確度有幾高就見仁見智。
隨住市況轉變，發展商賣樓都艱辛好多，加上香港人接觸資訊愈嚟愈容易，要求更多，講解規劃已經變成賣樓的重要部份。好似大角嘴凱帆軒，長實為職員準備嘅售樓資料中，就包括一份好詳細嘅規劃圖，重填唔同顏色，規劃話你知，專業精神可嘉。
各大代理行為咗馬灣珀麗灣呢場仗，足足捱咗成個月，但剛剛做完都未有時間回氣，話咁快又要為嚟緊嘅大盤做準備。利嘉閣董事總經理Ivan（何紹章）透露，公司精英會一行70人，今日去上海，4日3夜，同中原上海同事開交流會，兼了解當地房地產市況。據Ivan講，同事在做買賣時，有唔少客都會問吓上海嘅投資環境，所以要去考察自我增值一番，避免十問九唔知。此行每人費用三千幾蚊，公司總支出二十幾萬，利記都算大手筆。
九建奪得市建局西環加惠民道項目，最開心嗰個竟然係測量師黎展鵬，佢第一句就話，終於見到市建局啲項目唔係由幾間大發展商瓜分，而係由中小型發展商承接。
佢一直覺得兩鐵一局項目，唔應該畀數家大發展商玩晒。以前樓市旺時，大發展商就主動搵市建局前身土發公司合作，樓市唔掂，市建局最需要銀両時，招標就反應冷淡。佢重話，市建局引入不同嘅市場元素，令發展項目較多樣化，有助解決財困。長遠嚟講，市建局多幾個合作夥伴，點都有好處。
馬季開鑼，華懋吳崇武特別醒神，因為佢哋公司嘅沙田碧濤花園擁無敵馬場景，佢話馬會只有會員先可以用馬場「百勝廳」睇賽馬，但只要買咗碧濤，就可以有私家「百勝廳」。聽講呢個私家廳最少要六百萬喎。
吳崇武又話要同中原施永青一齊拉頭馬，重大大聲話要拍老施馬屁，中原陳永傑一聽到，即刻同武哥講，拍馬屁要留番畀佢（做）。嘩！果然反應快，夠醒目。
蘭西到元朗錦綉花園睇樓好多次，但每次都會有種迷路嘅感覺，成五千幾間屋，地段由B去到M咁多（點解冇A段嘅？），且又有好多分段，簡直就係一個大迷宮。記得有次坐經紀車，可能個哥仔唔多熟路，在I段與J段之間游走咗成十五分鐘先搵到間屋。
近排蘭西再同經紀入錦綉，但見經紀姐姐在小路間穿梭，尤如人肉指南針一樣，心下一寬，閒談間問及一般經紀需要多久才能認清錦綉花園嘅地形？佢笑笑口話，一般最快都要一個月，慢就四個月。吓三個月都學成外語啦！要四個月咁耐？。不過，亦有例外，尤其係一啲區內topsale，佢哋甚至可以立即講出某段某街某間屋嘅花園用咩石鋪，神乎奇技。一再證明行行有狀元嘅事實。
蘭西
電郵地址：