馬季昨日開鑼，全城生晒。第一場「犀旋風」大熱跑出，蘋果馬經貼中，同廣大馬迷一齊攞個頭彩；而新董事鄭維志更頭威頭勢，去幫手拉番次頭馬。
呢隻「犀旋風」，馬主係工業家丁午壽同丁天立，上季未贏過，且曾經流鼻血。所以，昨日勝出，雖然派彩得三十幾蚊，但唔止丁午壽高興，就連練馬師方祿麟亦好開心。
至於鄭維志，佢雖然做製衣生意，唔係做玩具，但都係工業家，同丁午壽又老友，梗係掹車邊一齊在凱旋門影番張相留念，亦讓廣大馬迷見見佢。今日見埋報，邊個重敢話佢好少入場，唔愛馬？
話說早前馬會選新董事，有人批評鄭維志不熟悉馬事，除咗兩隻團體馬「海明珠」及「海珊瑚」，自己都冇養馬，重好少入馬場，擺明係柴佢台。不過，八方都寫過幾次話佢同許仕仁贏梗，其他人就算點努力都無得鬥。
點解？因為馬會選舉方式，絕對係畀面遊戲，有董事局推薦名單，如果冇佢哋祝福，根本凍過水。以為二百遴選會員會民主投票者，實一廂情願，故簡文樂、梁仲豪、陳炳璋從來只屬陪跑分子。
傳真︰2623-9278
電郵︰