美股上禮拜五又跌，港股如跟跌，則係連跌7日，話唔埋有技術反彈。今晚美股冇市，港股或者易搞啲，應跌而不跌亦有可能。
太A（019）自從上月初派半年成績表，走勢向好，有盤靚數獲得芬佬收貨，第日個市定番，回升個勢將較其他藍籌威啲，留意趁低收集啲太ACall輪。
太ACall輪有9307、9403同9475三件，其中9475乃係正路對象，明年5月到期，現價54仙，溢價8.4%，槓桿率6.5倍。差唔多重有9個月命，相等於每個月1%溢價，唔貴。旗下國泰航空（293）近日有申請內地航線新聞撐住，股價堅穩，對太A都會有啲支持作用。9475上禮拜最低49仙，吼住重見低位入市。其他兩件太ACall輪，溢價過高，交投太靜，唔啱炒。
華創（291）係硬靜股份之一，明日派半年成績表，去年同期因為有特殊撥備項目，今年上半年條數會好搶眼，昅住啲Call輪，如果輪價冇乜郁，執些少無妨。
華創Call輪9368有得諗，現價1.10元，溢價2.8%，槓桿率8.0倍。其次9270，溢價同槓桿率都低啲，不過勝在1年後到期，壽命好長。
章 盛