梁智鴻做醫管局主席，接替羅嘉瑞，能有甚麼好方法，將醫管局起死回生呢？照計只有一條，就係公立醫院加價，唔加價就死梗。羅嘉瑞係醫生，亦係商界中人，知道公立醫療系統使費，不斷上升，皆因產品太靚，收費太平，顧客不斷湧到，服侍顧客嘅MC（邊際成本）大過MR（邊際收益），呢間公司只顧搶市場佔有率，遲早唔掂。不過羅醫生深明此理啫，楊局長就係社會主義派，優柔寡斷，羅醫生素來話慣事，點解要受掣肘吖，於是做到期就鬆人。
呢日在街上撞到一位十年不見嘅親戚，問佢近況如何，佢話：「做醫院阿嬸二十年，等退休囉。醫管局只係識慳錢，走一個唔會補番人，我啲老友輪住退休，啲工夫係咁壓落啲未走嘅人度，真係愈做愈辛苦。啲姑娘（護士）走咗，又係冇替補，於是舊人做到氣咳。計我話，我喺產婦室做，產前、產後照顧無微不至，錢就收幾十蚊一日，我唔識嘢都知道好難維皮啫。」估唔到呢位親戚亦會大罵楊永強，亦主張增加收費。唔增加嘅話，醫管局只能節流（即係前線工作人員加「辛」），無法開源。到到節無可節之時，都係要增收費用嘅啫。
親戚又大罵啲實習醫生，一代不如一代，近年啲新人唔識得尊重別人，冇禮貌，唔夠公德，最識嘅就係投訴、投訴、投訴或者蝦阿嬸。但親戚冇鬧大學噃，佢話：「呢啲係家教，基本做人道理，係要阿媽指導嘅！」