十一歲的Mimi老是躺在床上，一日瞓足十六小時，懶做運動，又常常搶別人的東西吃，於是一年肥過一年，現時已有廿六吋腰，重廿五磅半，體重還以每年一磅的速度增長。潮流興瘦身，Mimi就要食到身形像個波才高興。
這隻「罕見」的肥貓Mimi是加拿大短毛閹貓，女主人Sherin九年前從朋友家中把牠湊過來，當時兩歲的Mimi只有十五磅，還很有線條美，但此後不斷脹大，體重一年「榮升」一磅，至今已重達廿五磅半。Sherin說：「啲朋友嚟到第一眼睇到都俾佢嚇親，話佢似狗多過似貓，不過其實佢真係好『狗』！好鍾意『蝦』其他啲貓。」
獸醫學會會長賴恩獸醫師都說Mimi太肥，一隻正常的加拿大短毛貓應該只有十至十四磅，癡肥的貓跟癡肥的人一樣，容易患上心臟病。Sherin應該給Mimi進行一個為期六至十二個月的減肥療程，到寵物店買點減肥餐，早晚給Mimi做幾次運動，例如拋螢光棒給牠追逐等等。
記者拿出軟尺給Mimi度一度三圍，結果是廿六、廿六、廿六。在記者一再追問下，Sherin才承認給Mimi餵得太多貓餅：「我特登餵多啲貓餅㗎，一星期餵三點五公斤左右，如果唔係，佢會搶小咪(Sherin另一隻身形標準的八歲貓兒)啲嘢食㗎。我都有幫佢做運動嘅，例如幫佢做sit-up咁囉。」
Mimi去過看醫生，獸醫師說牠健康正常，毋須節食。Sherin也清楚貓兒太肥會有心臟病：「係喇！佢好細膽㗎，大聲啲同佢講嘢都會縮埋條尾喺個肚度㗎。不過其實我都鍾意佢咁肥，我覺得Mimi自己都鍾意。」賴恩慨歎香港的貓主缺乏時間和空間給貓兒做運動，很多家貓都過重。
本報記者蔡元貴