向來以製造超級跑車而聞名嘅雅士頓．馬田（AstonMartin），最近有傳佢哋將於2004年夏季推出新一代DB7；新車除擁有更具流線型嘅車體設計外，一台5.9公升V12引擎所迸發出嘅強勁馬力，亦為新車賣點所在。
現時廠方編號為AM803嘅新版DB7，雖然整體造型望落與現有型號相近，但全新鬼面罩設計，加埋一組炯炯有神嘅頭燈組合，卻予人有一份攝人魅力；另一方面，新車更用上全新鋁合金車架，配合全新懸掛組合，從而可增強車子嘅循迹性及操控感。
不過最吸引嘅，相信會係引擎蓋下一台5.9公升V12引擎，馬力輸出高達440匹，就連扭力輸出亦見強勁，因而令新車無論起步抑或加速，都會有不俗嘅表現。然而，車廂空間及設備亦見充裕，從而令車上乘客可有更舒適嘅乘車環境。有興趣嘅車迷，就要留意新車嘅確實推出日期喇！