呢日走入去電車路某銀行買外匯，搵櫃台職員梗係冇咁好滙率（rate）啦，於是話明要見S經理，S經理立即出嚟歡迎，走入密室，鬼咁好招呼，兌滙率又好，左丁山十分滿意。
S經理話：「左生，對唔住嘞，下個月我就退休，以後請你搵我老闆！」咦，做得咁好，咁妥當，做乜退休呀？S經理話：「銀行推出提早退休計劃，個package幾吸引，我做咗三十幾年，都想唞吓，去吓遊埠，去吓馬場，輕鬆啲。」
大公司啲提早退休計劃，其實係想送走一啲生產力低嘅老人家，偏偏好多時，你想佢退休嘅，佢唔肯走；你想佢留低嘅，佢就立即鬆人，正係人算不如天算，S經理就係呢一類！
銀行總行嘅大堂經理，級數唔算高，但做得耐而有顧客緣嘅，對銀行好重要，可以幫銀行留住啲大存戶。好多年前，一間美資銀行嘅分行設於聖佐治大廈，雲石樓梯直上大堂，氣派好威煌，邵逸夫、顏成坤太太之類嘅大客會坐𨋢上去，乜人都唔理，最緊要係一位S襄理走出嚟親自招呼，S襄理啲熟客嘅存款，數以億元計，佢後來轉工，有唔少存款跟埋過去㖭。
S經理有乜巴閉，左丁山唔知，但現在的大存戶，多數上咗年紀，喜歡見一啲成熟可靠嘅面孔，乃係事實。
照我話，當S經理嘆咗六個月之後，就可能覺得空閒無聊，銀行請佢返去做兼職，叫佢坐響大堂招呼大戶，諗得過。