前日政府公布最新一季嘅GDP，但財爺阿松唔見人影，咁大件事都唔理，究竟佢去咗邊？原來阿松請咗兩日假，同愛妻小伏雙雙返咗湖北省武漢嘅娘家，一連兩日補擺喜酒大宴親朋，人生大事當前，香港經濟「話知佢先」。
中新網噚日引述武漢嘅地方報紙《楚天都市報》報道，話梁生梁太前日返咗武漢，即晚就喺當地嘅東方大酒店湖北廳設宴。兩個咁重量級嘅「明星」嚟擺酒，點逃得過同胞們嘅耳目？由兩人前日下晝兩點一落機，就有當地讀者報料，話佢哋到咗武漢，後來又有人再報料，話佢哋晚上七點喺東方舉行宴會。呢間東方大酒店，梗係五星級豪裝啦，聞說阿松當晚擺六圍，每圍三千蚊人民幣，認真抵食。
擺咗一晚重唔夠喉，梁生梁太噚日喺武漢另一間五星級酒店，香格里拉大飯店再擺多一輪，而且重包咗個全廳，由晏晝十二點食到兩點。呢個廳有兩個出入口，但一早已經俾人封實。八方聽聞，有當地嘅記者偷偷混咗入去，但即刻俾人趕返出嚟，結果搞到讀者無緣睇到阿松嘅擺酒相。話時話，阿松飛甩香港記者咁鬼叻，對付大陸記者，梗係小兒科啦。
傳真︰2623-9278
電郵︰