重有唔夠一個月就係中秋佳節，好多月餅供應商都諗緊計催谷銷量。八方噚日收到料，話做地產代理嘅中原地產撈過界賣埋月餅，但對象唔係普羅大眾，而係自己班員工，目的就係等啲員工買多幾盒月餅送畀客戶食，搞好啲關係。
八方即刻搵中原執行董事陳永傑問清楚，佢老兄就同八方講，話由於公司今年二十五周年，所以就特別訂製咗三千盒印有「中原地產」四個字嘅月餅，等各區董事可以送畀客戶，而員工亦可以以半價六十蚊自由訂購，完全冇強迫成份。佢話，唔排除可能有啲店舖經理熱心過頭，經常「鼓勵」員工自掏腰包買多幾盒月餅請客戶食，令員工誤會。
傳真︰2623-9278
電郵︰