2.0公升級中型七人車近年當旺，五大日本品牌出品如豐田Picnic、本田Stream、日產Prairie、三菱Dion及萬事得Premacy先後登場，而且重各有捧場客，保守估計呢類七座位MPV，近兩年已售出約5,000部，成為家庭車市場嘅主流派；當中萬事得Premacy屬先頭部隊，率先於1999年中抵港，並曾在短短兩個月時間內售出逾千部新車，創下金融風暴後車壇第一個神話。
熱賣型號喺二手市場通常受追捧，而萬事得Premacy亦唔例外。近年二手市場上，Premacy嘅交投表現暢旺，但面對同級對手嘅競爭，尤其係近月Picnic、Stream同Prairie已偶然於二手市場出現；其中2001年嘅Stream1.7，最近試過$115,000易手，而Premacy嘅二手叫價亦比年前大幅走軟，最早落地嘅1999年車，現時市價約$55,000至$60,000，2000年約$70,000至$80,000，而2001年嘅2.0型號成交價則約$90,000上落。
預期當同級新車嘅二手放盤喺市場湧現時，對Premacy嘅二手價肯定再一次構成壓力，但係以6萬元以下就可以買到只有三年車齡嘅七人車，站在用家立場，吸引力確實比一般五座位房車強，純粹係家庭代步用，用夠四年待驗車限期到之前才換車，將6萬元車價拉勻，平均每年都只係萬多元，實在係精打細算型家庭作為換車考慮嘅首選。
Premacy分早期嘅1.8公升及2001年尾輸港嘅2.0公升型號，馬力同為135匹，但2.0公升型號嘅扭力輸出就高達17.4kgm，比1.8型號嘅16.5kgm好力些少；而Premacy嘅車廂設計甚有特色，三排座位逐排加高，後排嘅空間唔算好寬敞，但總算可容納成年乘客，實用程度算係OK！
唔少用家其實只將Premacy當作一部5座位家庭車用，呢類用家喜歡將尾排向前摺起，以騰出更大車尾空間來載雜物；所以買家於買車前必須確保後排收摺無問題，手抽位及頭枕不能有破損，如車尾長期作載貨用的話，就要留心布座是否有過量污迹。
此外，由於Premacy多為小家庭用車，呢類車要留意車廂座椅、門板、地台及車頂周圍，是否有由小朋友做成嘅各類頑固污迹，免得買車後要使多一筆大掃除開支。