盧巧音與余文樂分手後積極投入工作，表面看來，分手一事似未對她造成影響，但事實上，性格剛烈的盧巧音原來要靠不斷沖涼來治療情傷。而對於過去的一切，她亦不想回首。
愛情篇
憑一曲《垃圾》起家的盧巧音（Candy），近日一首《好心分手》唱得街知巷聞，難怪與Sony唱片公司約滿在即的她，成為各大唱片公司的搶手貨。在樂壇上，盧巧音頗吃得開，但在感情路上，她卻連番碰釘。
現年二十八歲的盧巧音，早前與拍拖八個月、正人氣急升的余文樂宣布分手，箇中原因，盧巧音隻字不提，只是以努力工作來面對一切。
盧巧音： 盧 記者： 記
盧： 已經係history（歷史），caseclosed（事件完結），唔想講。
記： 結束一段感情，唔通一啲唔開心嘅感覺都冇？
盧： 我諗每一個人如果失戀，又或者突然間冇拖拍，都會唔開心，呢樣嘢好正常，每個人都會有，視乎你點樣去處理。喺我嚟講，係靠自己同朋友，有意志嘅話，任何事都可以做得到。
記： 唔開心嘅時候你會點做？
盧： 我會沖涼囉！當然唔係叫你一日沖十幾次啦，一日沖兩三次咁，我覺得沖涼好舒服。重有就係做嘢嘅時候就最開心。
記： 會唔會係借不斷工作嚟逃避現實？
盧： 冇話逃避嘅，都過去咗，冇得避啦，我亦唔覺得係麻醉自已，呢個file完結，另外一個file開咗，就係做嘢，冇需要再去諗。同埋我身體唔好，我唔想甲狀腺再有事，我父母都係驚我健康唔好之嘛，其他嘅嘢，咁大個女識得諗㗎啦。
記： 𠵱家嘅你，對愛情有乜睇法？
盧： 依然有憧憬㗎！
記： 會唔會覺得男女雙方如果工作太忙嘅話，好難維繫到感情？
盧： 唔係呀，娛樂圈有好多啤都維繫到呀，如果大家真係愛大家，會肯犧牲嘅！
記： 咁你係咪一個肯為愛情犧牲嘅人？
盧： 唔會，我𠵱家工作行先。雖然我對愛情仍有憧憬，但唔會刻意到處尋尋覓覓，更加唔會為愛情犧牲工作，總之緣份要來便來，一切隨緣。
撰文：戴彩煥
攝影：陳志嵐