盧巧音熱愛工作，但卻不喜應酬，或許有人認為在娛樂圈中生存，以盧巧音的性格而言會比較輸蝕，但她深信「講多無謂，行動最實際」，只要肯努力，一樣可以堅持自己的立場。
盧： 我極度怕應酬，我唔係social嗰批人，要蒲嘅話，喺屋企蒲好過，我鍾意喺屋企講吓電話，上吓網，玩吓貓，睇書聽歌，好快就過一晚。出街飲嘢我覺得好嘥時間，又嘈喧巴閉，講說話又要大大聲，都唔知為乜，傷到把聲反為其次，主要係好無聊。朋友生日或者好耐冇見，間唔中去吓就話啫，一個禮拜去幾次social，冇必要我都唔會去囉。再講，我係唔飲得嗰啲人，飲少少就會亂講嘢。
記： 你𠵱家咁努力工作，目標係咪「最佳女歌手」獎？
盧： 我冇呢啲目標，對我嚟講冇乜所謂，最緊要做好本份，但有固然係好啦。
記： 作為一個音樂創作人，有冇諗過好似容祖兒同陳冠希咁，去外地進修一吓，比自己唞唞氣？
盧： 我唔想去唞氣，亦冇咁嘅需要，我都唔係好大壓力！但我就好想去外地進修，睇吓外面個世界。不過，香港唔可以容許我咁做，等你返到嚟，大家咁健忘，都會唔記得你啦！加上我𠵱家嘅工作就算係短程旅行都冇時間去，我係有咁嘅計劃，但現實唔容許我咁做。
原來盧巧音本來最希望到美國紐約見識，早幾年她有機會免費到美國開眼界，可惜她到領事館申請簽證時，因為公司信出現了一點問題，被領事館人員諸多盤問，最後更拒絕了她的申請，令盧巧音一怒之下，決定永遠不去美國。
盧巧音，就是一個如此大情大性的人。