人生總有順流逆流。
年薪曾經過百萬的鄭兆聰，今個球季就算願意減薪也未能在港落班。當大家也為其前途擔心時，他反而重複提醒，足總、球員及班主不要輕易放棄，樂觀些去面對將來。
他說，今夏最震驚、最難受並不是被南華拒絕續約；而是聽到晨曦兩名主將楊熙智及姚學文，在最當打之齡為了前途，毅然放棄足球事業，轉行做消防員。
「其實香港球員應該將眼光放遠些，如果這裏真的冇出路，其實可以嘗試到其他地方一試。」鄭兆聰說。 圖?文：曾雁平
問 ：有沒有想過，球市會出現這個境況？
鄭 ：球市持續不景，上季中預計到前景唔好，而香港球圈好細，早已聽到班主組軍方向會係點（減薪）。𠵱家本地球圈競爭實在太少，當競爭咁少嘅時候，就乜嘢事情都可能發生。
問 ：會否想過無法在港落班？
鄭 ：代表港聯同港隊多年，年紀又不是好大，當然想踢落去，而我亦知道現時環境唔好，如果球會有誠意搵我幫手，想爭取成績，我唔介意減薪。最震驚係喺哥斯達黎加聽到楊熙智同姚學文轉行做消防員嘅消息，佢兩個當打球員都放棄踢波轉行，可以想像情況有幾差。我只係未落班，還未想過放棄足球事業。
問 ：香港足球是否欠缺了資源發展職業足球？
鄭 ：相比起中美洲，香港個別球會嘅資源已經不差，但為甚麼中美洲可以搞得不錯，香港球會搞得咁差。其實最主要看足總、球會及球員嘅態度，到底大家有冇「心」想搞好足球。我好怕看到有啲球會，求其搵些年輕球員，畀幾千蚊，就話踢職業，球迷入場是睇踢波，唔係睇跑步。
問 ：現階段有甚麼具體計劃？
鄭 ：我仍會嘗試在港搵班落，亦會向新加坡及印尼探路，再唔係會考慮返哥斯達黎加踢，但我想趁重有能力到亞洲二線足球地區，好似新加坡或印尼落班；如果成功，可以為本地球員開拓到一條出路。其實本地球員應該要有夢想，嘗試到高水平地方踢波，咁先至有進步。
問 ：你前年曾接受膝部窺鏡手術，近兩季你表現回落，是否與傷有關？
鄭 ：上季最大目標是多操多踢，基本上做到，也助南華贏了三個盃。上半季踢得唔差，下半季走樣，我諗有幾個原因。首先係壓力大，其次是因為某啲原因，令到我係港聯未獲重用，之後又看不開，竟然自我放逐。我向來唔係輕易放棄嘅人，今次肯定係自己唔啱。至於膝傷，應該沒有問題。
鄭兆聰在港看罷世界盃，便返回哥斯達黎加度假及探望親友，而今次返港處理私務的同時，每早七時便開始跑步練氣，當然還有嘗試聯絡本地球會，看是否可以在港延續球員生涯。
很想在港結束球員生涯的「聰仔」說：「我嘅球員生涯好幸運，相信未能在港落班只是暫時性；開咧後，我諗會有球會搵我斟介，到時或者可以與球迷在球場見面。」