韓君婷、鄧萃雯、王合喜同鄭嘉穎噚日喺美麗華酒店，出席《東瀛遊特約：大學群英越野狂奔》之「群英匯聚水中爭霸戰」嘅記者會，一眾藝員遲啲會同十名大學生參賽者去澳洲拍外景。
纖體後嘅韓君婷噚日同一班參賽者大玩水上遊戲，不過韓君婷只係着咗一件頭泳衣，重要喺外面加咗短褲同埋背心落水。
韓君婷比起之前的確瘦咗好多，但又唔及得廣告相咁瘦，問佢係咪對於自己嘅身材信心不足所以唔敢以泳裝示人？韓君婷話：「唔係呀，只不過我安全為上，我都係怕會走光先至咁着，𠵱家我簡直有模特兒嘅身材。」
記者笑佢已經可以除去「籮霸」呢個稱號，但胸部就細咗，韓君婷即刻話：「我個胸冇細到。但你哋咪即管叫我『籮霸』囉，不過我唔會應，因為我已經唔係『籮霸』。」
沈殿霞噚日喺電視城為《兒歌金曲頒獎典禮2002》拜神，肥姐話佢遲啲會主持一個清談節目。講到好友羅文嘅健康，肥姐話：「噚日（即前日）我先同佢傾過電話，佢家姐同妹妹喺廣州嚟咗探佢，籮記瘦就一定瘦㗎喇，但佢胃口好好，之前重問我邊度有好嘢食，佢又唱得又食得又跳得。」
李嘉慧同新男友Vincent前晚喺蘭桂坊出現，嘉慧見到成班記者都表現得好愕然。原來佢嘅新男友係經朋友介紹嘅，已經識咗四年，不過只係拍咗幾個月拖，感情重好穩定，但係嘉慧就唔肯定對方係咪真命天子，皆因佢話感情嘅好難講喎！
日本女星藤原紀香同韓國女星金允珍，噚日下午喺台灣盛裝出席化妝品記者會，問到紀香同郭富城係咪好事近嗰陣，紀香尷尷尬尬咁話希望感情世界有私隱權，如果幾時決定結婚，一定會話畀大家聽。金允珍就講笑話：「我唔清楚紀香同城城嘅嘢，但應該唔係真，其實郭富城係我男友至真！」
吳鎮宇同胡杏兒噚日喺赤鱲角機場拍無綫新劇《衝上雲霄》，生得高大嘅鎮宇着住套機師制服，都幾有型有款。鎮宇重教記者，愈高級嘅機師，袖口就愈多間條，而鎮宇袖口就有三間，佢話遲啲會升上去四間喎。講起羅文，鎮宇話相信羅文病情幾樂觀，因為佢性格樂天喎。
楊其龍前晚同一位棕髮洋妞搭的士離開蘭桂坊，點知楊其龍上車後，立刻將手中嘅煙頭喺車窗掉出嚟。雖然政府最近大事宣傳隨地拋垃圾會罰款六百，但楊其龍似乎冇響應政府，掉完煙頭重拿拿淋叫的士司機開車走。
阿牛噚日特登喺大馬飛嚟香港為有線《2002香港兒童競選大賽》做表演嘉賓，阿牛噚日生日，有線就搵咗班參賽小朋友同阿牛慶祝兼切蛋糕，有個小妹妹重踴躍送上香吻。阿牛話：「我都有個一歲大嘅女，我同馬來西亞係同一日生日，噚晚（即前晚）我同老婆、囡囡一齊慶祝國慶兼生日。」
黃安琪噚日喺電視城出席《兒歌金曲頒獎典禮》拜神儀式，提到被誤認係最近牽涉綁架案嘅前落選港姐陳安琪，黃安琪話：「聽到都覺得好大件事，自己都有啲擔心。我覺得藝人要小心言行，千祈唔好呃人。」問到會唔會改名，佢話：「冇得改，個名係媽咪改嘅，意思係好似天使咁可愛。」