啱啱公布半年賺咗2.5億嘅TCL國際（1070），喺連續下跌超過一個禮拜後，上周尾段走勢開始轉靚，市場上班捧場客亦開始喺兩蚊水位吸唔少貨，就連平日少見嘅基金盤都好似出番晒嚟。伏勝問過一啲有跟開呢隻股票嘅行家，佢哋話不妨喺兩蚊水平執番啲貨，因為TCL喺國內嘅手機市場搶到唔少生意，斷估今年應該有機會賺多一倍。
隻股一向都有好多基金客捧場，應該重可以睇好啲㖭，要上到2.4元應該無乜問題。不過，另外有線人同伏勝講，話市場上呢排啲大戶炒乜都係好短癮，叫各位小心啲，同埋唔好太大貪，如果個市有乜冬瓜豆腐，記得要走至好。
早前話要賣人造聖誕樹業務嘅寶途（585），終於喺上個禮拜五開完特別股東大會後通過咗，寶途會向股東派發每股0.26元特別股息。雖然今次伏勝無份「分享成果」，但仍然對今次單交易非常不滿，點解？皆因除咗原有大股東是否關連人士係個疑問外，隻股仔連最值錢嘅業務都被賣走埋，以後公司真係唔知靠乜嚟搵食。
最慘就係經過派發特別股息後，大股東唔單止在賣「樹」中險勝一仗，重可以喺公司度「掠」番5億幾出嚟，到時候公司無晒錢搞新業務，會變成點真係不敢想像。今次伏勝想唔鬧班監管機構都唔得，是否關連人士其實明眼人一望就知。
呢壇嘢其實重未完，皆因上星期五有啲投資者見隻股會派0.26元特別息，好多人為咗不甘落後就即刻飛身入市，點知隻股停埋牌。睇嚟呢次又係冇人需要負責，喺啲咁樣嘅市場監管制度下，各位散戶以後買賣股票時，真係要打醒十二分精神！
伏勝