光榮以三國歷史為題材，開發嘅動作戰略遊戲《真．三國無雙》系列獲得空前成功，玩家日以繼夜咁要儲齊41名猛將及第四把專屬武器，光榮當然唔會俾呢股熱潮冷卻，乘勢推出《真．三國無雙2～猛將傳》，誓要玩家全情投入三國世界之中。
記者：徐影龍
(C)1999-2002KOEINETCo.,Ltd.AllRightsReserved.
《猛將傳》最大賣點係彌補《真．三國無雙2》嘅不足，重新加入七名猛將嘅無雙模式（即個人故事模式），包括機迷期待已久嘅呂布及貂嬋，再加董卓、袁紹、張角、孟獲及祝融合共七名猛將故事模式，要玩齊相信都需要花一段時間先得。
另外今集新加入武將人物可以護衞兵身份上陣殺敵，除幫手消滅敵人外，最重要係上集雙打時先出到嘅終極必殺技「激．無雙亂舞」，今次可透過電腦擔當嘅武將護衞兵合力使出，令單打都可享受「激．無雙亂舞」嘅殺敵快感。值得一提係今集玩家可自由設定護衞兵各種狀態，如衞隊名、衞兵名、性別、人數、兵種、行動方針、成長類別、服飾、裝備等，即係培育全女兵上陣殺敵都得。行動方針追加了「鐵壁」和「援護」，前者集中防禦主武將，後者集中攻擊敵弓兵（最討厭的弓兵！）
光榮推出《猛將傳》絕對屬絕橋一條，因為玩家可將之前《真．三國無雙2》嘅遊戲Save抄至新Game內繼續玩，除咗可獲得新裝備及道具外，最重要係設有專屬嘅第五把終極武器，取得後武將能力可大大提高，以趙雲為例，當裝備LV5終極武器「擊龍膽」後，基本攻擊力加13，兼具雷屬性，另外無雙、體力、攻擊範圍等數值全部大幅提升，可算係玩家擁護武將必取嘅夢幻武器。
除武器外，亦新加入大量新道具，如皇帝手綱、狂擊戰書、仙丹袋及獸神轡等，各有唔同用途，部份新增道具要在挑戰模式中取得，例如在速驅模式中1分30秒內過關便可取得獸神轡，可以知道最後所騎馬匹的位置，今集連護衞兵都有特別的武器和道具可用，即使玩爆上集重玩新武將都冇咁悶。
自《猛將傳》一推出，好多玩家都議論紛紛，搞唔清楚到底咩情況之下要換入《真．三國無雙2》。其實單獨一隻《猛將傳》只收錄七名新武將嘅無雙模式，想玩埋其餘34個武將嘅無雙模式及攞埋專屬嘅終極武器，都必須先Load《猛將傳》，選取「ORIGINAL」後再換入《真三2》，一輪Loading後換回《猛將傳》，便可開始其他武將嘅無雙模式。兩隻遊戲嘅Save都係獨立嘅，並非網上流傳咁Load一次《真三2》再Save就得，換句說話講，舊有武將想擁有終極武器及裝備新道具，必須同時擁有《真三2》及《猛將傳》兩隻碟，兼且每次開機玩都要換兩次碟，當然你亦可當《猛將傳》係一隻獨立嘅Game咁玩，內容自然就冇咁豐富啦。
之前玩《真．三國無雙2》時嘅Save可以用番，不過只是武將嘅能力可保留，武勳會從頭算起，所以武勳需要重練，亦即係話不要以為以前練到好勁嘅武將一上場就可以胡亂騎馬，隨時拋你落地。
《猛將傳》售價：$350
《真．三國無雙2PremiumPack》售價：$620
售賣點：DreamStore
查詢電話：25753285
地址：灣仔東方188商場256號舖
估唔到光榮比中國本土將三國歷史更為發揚光大，三國遊戲長賣長有，換個玩法換個包裝又成一賣錢系列。繼今次《猛將傳》及《真．三國無雙2PremiumPack》後，跟住嚟有PS2TheBest系列嘅《真．三國無雙》及《決戰》，年尾輪到XBOX出《真．三國無雙2》，當然唔少得跟手出埋《猛將傳》，最後重有必定會有中文化嘅PS2版《猛將傳》，總之光榮暫時唔開發新Game，淨跨平台出移稙版已經可以進帳不少。