個市窄幅波動，收市前恒指本來有啲進帳，點知中銀（2388）忽然俾人攞嚟開刀，掟落8.40收市，跌15仙。早段，一度做8.65元。
中銀幾個價位上落，中銀Call輪變化，則唔係咁計，波幅相當大。最多買賣嗰隻9458，前市62仙，昨日最高67仙，收54仙，早上摸頂入貨嘅，即刻坐艇近2成，都幾凶險。
不過中銀跌到8.40元，又已低過8.50元嘅招股價，再落去嘅風險有限，亦有可能再跌即有反彈，中銀Call輪博得過。9458同9456，兩隻條件差唔多，都係明年2月同1日夠鐘，槓桿率同溢價又差唔多。想溢價低啲，可以揀9459，槓桿率自然稍低一啲。
大嘢中，聯通（762）有10仙進帳，收5.75元。因為咁，隻聯通Call輪9035做咗是日輪王，收1.9仙，升幅58%。
9035係仙輪，成交量唔夠1球，金額唔夠2萬銀，輪價易誇張。隻輪兩個幾月後到期，溢價14.6%，槓桿率30.3倍。到尾計，隻輪作廢機會好大，其他聯通輪，溢價多數都係過高，暫時唔值得諗。
中移動（941）又跌15仙，再跌啲，可以揀啲Call輪玩吓。
章 盛