政府噚日正式公布梁智鴻接替羅嘉瑞，接任醫管局主席，點知開記者會時，羅嘉瑞同楊永強「互片」，真係精采。其實政府喺羅家瑞約滿一個月前，就宣布梁智鴻接任，都算從上次AnnaWu（胡紅玉）續約事件吸取教訓，學乖咗。
政府上次喺最後一刻先表態，隨即被各方鬧到飛起，雖然Anna熱愛平機會嘅工作，但政府唔應該畀得一兩日佢考慮，今次知錯能改，都算係咁。
講起梁智鴻，佢外號「金刀梁」，係泌尿科專家，醫腎病好叻，且屬罕有之仁醫。話說八方有一個老友，因母親身染頑疾，搵梁醫生幫手，住咗入養和，梁智鴻知佢哋唔係大富人家，就安慰佢哋，話醫院費雖然冇得減，但佢筆手術費同巡房費就可以收平啲，叫佢哋唔使咁擔心。老友感激之餘，知道隔籬左右房之病人，亦有同樣待遇，家境欠佳者都有價講。
好醫生難求，但梁智鴻又真係太喜歡從政，世事實難兩全其美。另外，際此醫管局交棒時候，八方想幫佢講句公道說話，雖然有好多傳媒不時苛責、攻訐佢，但香港公共醫療服務水平之改善，確有目共睹。
傳真︰2623-9278
電郵︰