洪朝豐兩年幾前投資咗三百幾萬，喺銅鑼灣開咗間古董店「霎東門」，唔夠四個月就蝕大本，關門大吉。雖然經歷過生意失敗，但洪朝豐佢近日再接再厲，同三位朋友合共投資六位數字，喺銅鑼灣嘅顯輝中心，搞咗間上樓舖「星表行」，專賣一啲限量版嘅手表，包括林寶堅尼、日本牌子Yuppies同Golf等等，價錢由幾百蚊到幾千蚊不等，同佢之前賣親啲古董唔係幾千就幾十萬、幾百萬，真係有天淵之別。
原來，今次洪朝豐將全副身家瞓晒落去，第日食粥食飯都係睇今次。馮仁昭問佢今次做老闆同以前感覺有乜唔同，洪朝豐就話：「上次開得個頭太大，冇足夠資金周轉，上次畀到我一個教訓，就係凡事要腳踏實地，唔可以一步登天。」洪朝豐又話雖然市道唔係咁好，但與其將啲錢擺喺銀行，不如做生意博一博。
宣萱噚日返電視城拍攝無綫新劇《流金歲月》，問到之前劉曉彤喺節目度，講到最憎嘅藝人就提宣萱，宣萱就好大方咁話：「我都唔喺現場，唔想評論咁多，我同佢都成七年冇聯絡，深交就一定唔係，不過玩遊戲嘅嘢大家唔需要太介懷嘅。」
陳文媛噚日接受電台訪問，問BoBo覺唔覺得歌手出碟嘅宣傳費愈嚟愈多，佢話：「出碟宣傳梗係重要，但係過份嘅宣傳未必得到理想嘅效果。」咁點先算過多宣傳呢？BoBo話：「做藝人應該要保留啲新鮮感，如果一次show晒，會冇新鮮感。」
鄭秀文噚日喺台灣出席一個化妝品公司嘅宣傳活動，推銷彩妝同唇膏，佢以一頭曲髮亮相，睇起嚟精神都唔錯，重即場幫一個女模特兒示範塗上最新色彩嘅唇膏。
個模特兒唔知係咪諗住有天后幫佢化妝，一定成為焦點，所以都博到盡，着白色tubetop出現，實行以鄭秀文最弱嗰瓣，即係身材搶鏡。
藤原紀香噚日專程去咗台灣，為一間化妝品公司宣傳，只見紀香戴住太陽眼鏡，着透視裝，面對記者擺出迷人微笑。最近佢同郭富城嘅緋聞又再炒得鬧哄哄。好奇怪，每次紀香嚟親香港或者台灣，佢哋嘅緋聞都會再被炒作，咁啱呢個時候，郭富城又頻頻曝光，真係有咁啱得咁蹺呀。
圈中有位外形討好兼電力十足嘅小生，雖然已經有個拍咗拖好多年嘅女朋友，但就好鬼花心，成日背住女友去媾女，惹惹埋埋唔少緋聞，都唔知佢女朋友點忍？
好似佢早排喺台灣拍電視劇期間，竟然走去參加一個私人制服迷幻派對，同啲女仔又攬又錫，而且重食埋搖頭丸，認真過份，佢見過蘇永康同安雅嘅例子，咁都唔知驚喎！
早兩日一個電視台高層同唱片公司高層、傳媒高層再加電影公司老闆，齊齊去咗尖東一間夜總會消遣，原本件事都冇乜特別，但估唔到有個周刊記者收到風，竟然好似打仗咁，重衝埋入去夜總會房間影相。
嗰幾個高層即刻call保安到場，最後成功拆咗個記者啲菲林，真係一額汗，都唔知點解咁大驚小怪？
周華健早前俾人入稟追債，佢都冇出嚟交代過件事，佢前日喺美國洛杉磯開歌迷會，提到呢件事，佢話因為自己對金錢唔太緊張，借得太多錢畀佢阿哥，先會搞到咁。不過成龍因為呢件事特登去華健間餐廳搵佢傾心事，華健好感動。