梁思浩日前主持電台節目《瘋Show快活人》時重提舊事，指當年的《香港電視》周刊棄用溫兆倫做封面，令他大發脾氣，不過溫兆倫昨日出席新劇記招時表示，對此事全無印象，已經忘記了。而郭羨妮則透露會與男士保持距離，以免再次緋聞纏身。
溫兆倫與郭羨妮昨日為無綫新劇《牛郎織女》試造型，一身古裝打扮的郭羨妮笑言自己終於不用演奸角，對於首次與溫兆倫合作，她開心地說：「雖然今次第一次同佢合作，但佢係一個好戲之人。」
問到會否擔心與對方傳出緋聞時，郭羨妮說：「點解每次拍劇都問呢啲問題，其實一直以嚟我都好畀心機做嘢，我𠵱家已經學識同男仔保持距離，寧願選擇同女仔傾多啲，就算俾人話同性戀或不和都冇所謂。」
此外，劇中飾演黃阿牛的溫兆倫，對於梁思浩日前於電台節目中，重提當年《香港電視》周刊棄用他而改由梁思浩做封面，更直指他即場掟雜誌發洩一事，溫兆倫回應說：「我唔覺自己紅過喎！自己一向都係默默耕耘，邊得閒去爭呀。」
溫兆倫續道：「我向來都係好低調，我真係完全唔記得呢件事，簡直係冇印象，你哋最好問番佢本人，我同梁思浩都算幾好朋友，不過好少聯絡，就算你問我噚日去邊度食飯我都要諗諗，何況係十幾年前嘅事！」
問溫兆倫會否覺得梁思浩有意舊事重提博宣傳？他說：「佢鍾意講乜嘢就講乜嘢，娛樂嘅嘢都係娛樂嘅啫。」
採訪：卓美娟
攝影：何國豪