余文樂昨日與數十名fans齊齊打保齡，但他卻當眾失威，兩度落坑。對於近日被指與麥浚龍和蕭正楠不和，及頻頻黑面的傳聞，余文樂否認之餘，又笑言自己犯太歲，易惹是非。
余文樂昨日相約五十名fans齊往沙田第一城銀城商場打保齡和玩遊戲。
余文樂雖然只是擔任評判和嘉賓，但其間他為了讓記者拍照，亦親身上陣打了兩球，不過兩球都落坑，連余文樂自己都忍不住笑說：「我之前都有打過保齡，不過唔得，打得好差。」
最新一期《忽然1周》有報道指余文樂不肯與蕭正楠合照兼黑面，對此余文樂僅以大笑回應，並反問記者相片登得靚唔靚。
余文樂說：「我冇聽過話要同佢影合照，我同蕭正楠有傾偈，我哋冇嘢，當日因為好曬，我又唔夠瞓，所以冇乜表情，唔係黑面。我再見到蕭正楠唔會尷尬，大家知乜事，但我又唔會主動搵佢合照，咁樣太刻意。」
余文樂續說：「你哋都成日話我同Juno（麥浚龍）唔啱啦，根本我哋就冇嘢，我都幾惹是非，可能係犯太歲，成日唔笑所以啲人以為難相處，以後我會笑多啲，我𠵱家咪係『笑男』囉！」
對環球唱片公司擺明力谷Juno一事，余文樂說：「大家輪住嚟啫！陳少寶（環球高層）話我嘅宣傳費唔會少得過Juno。」
Juno有收錢的職業fans為他捧場，問余文樂會否也有這種fans時，他說：「我唔使，如果畀埋啲錢佢哋賺，咁我咪唔使賺？」
採訪、攝影：汪正文