浙江玻璃（739）公布中期業績盈利急跌74%後，股價即刻大跌28%，收1.21元。再有一間民企表現走樣，你話點叫基金對佢哋有信心呢？
經紀陳好感歎，佢話大成生化﹙809﹚公布中期業績，雖然錄得盈利增長5.8%，有成1.74億元，兼且派中期股息1.5仙，睇落都唔太差，但一樣有外資大行話唔理想，聽講搞到有基金密謀出貨。不過，噚日大成股價仍升3.6%，收2.15元。
經紀陳話，外資大行覺得大成業績唔係好似表面咁好，邊際利潤其實係細咗，但最關注都係大成發行嘅認股權太多，雖然已經行使咗好多，但仍有一大部份未行使，對股價構成潛在壓力。
其實大成已經炒咗好長一段時間，不宜過份憧憬。若對民企仍未死心嘅話，哈爾濱啤酒﹙249﹚其實重有得諗，一來隻股新簇簇，二來聽聞有班大陸客支持。噚日隻股急升14%，收1.86元。
慕容小初