港股噚日繼續牛皮悶局，恒指收報10043，跌17點，成交只得43.5億元。後市要留意中國電信上市計劃，中電信傳以派息比率20%作為招徠，明攻中移動（941）死穴，相信市場焦點會放落中移動派息比率身上，若市場預期中移動派息比率唔夠吸引，則可能會展開換馬行動。值得注意係中移動今年可能只會作象徵式派息。
寶途（585）噚日急升51%後停牌，等待股東大會表決派特別股息每股0.26元議案結果。唔知股民係咪有誤會，噚日寶途表決派發之股息，其實早於8月26日已經除淨，所以當日股價由0.30元跌至4仙，而噚日股東大會只係按例通過派息而已，唔係再派多0.26元。但奇怪係點解港交所（388）會容許寶途在股東會未有結果前就畀佢除淨，假如除淨後股民以每股4仙沽出寶途，但大股東突然發神經，在股東會上投反對票，派息議案不獲通過，咁股民嘅損失應該向誰追究？呢個技術上嘅漏洞，港交所應該要檢討。
電盈（008）噚日曾跌破1.40元，低見1.37元，沽盤壓力唔輕，不過最終由瑞銀華寶買盤撐回1.40元收市，跌幅收窄至2%，成交7810萬元。黑客話，有人唔想電盈俾高盛講中，要跌至1.30元水平，所以入市力托。事實上，若電盈股價跌至1.30元，市值就連300億元都唔夠，真係好難有面目見人。
人人控股（2964）合併後復牌即急挫62%，收9.5仙，但成交只得42.98萬元。Cookie話，真正嘅沽盤尚未湧現，1仙股合併生效後幾日，通常都會繼續跌，所以唔好撈底。
阿 虎