梁錦松、伏明霞趁暑假拉埋天窗之後一個月，兩口子終於開始雙雙出席公開場合，又去宴會，又去音樂會，唔再左閃右避，重鬼咁溫馨，真係羨慕死好多人。
不過，講吓講吓，又快到九月新學年開課時候，霞女原本喺清華大學經濟管理學院修讀企業管理，念嘅係特招班，全班同學都係國家一級運動員，如果八方冇記錯，霞女重有一年先畢業，𠵱家中途嫁咗畀阿松，新婚才一個月，要兩地分開重返校園真係唔容易。
八方搵人向清華打聽，究竟本科生可唔可以結婚？因為聽講清華都好嚴，一般情況學士學位課程都唔准，怕會影響學業，不過好似佢兩個咁特殊情況就可以申請「特批」。清華校方重話，𠵱家連學士生嘅年齡限制都放寬埋，所以結婚生仔再唔係大問題；咁究竟霞女有冇申請休學？佢就話個人私隱唔肯答，重鬧鬼香港記者問埋呢啲嘢「真沒有意思」。
但係讀者鍾意睇，冇法。問多兩問，有位老友重爆條勁料畀八方，話佢親口問過阿松係咪將為人父？答案係松太未有BB，點有得做人老竇？咁大單新聞，咁大誤會，阿松點解唔出嚟澄清吓，唔使愛妻俾人投以特殊目光。拍拖就咁高調，追到手結埋婚就遲遲唔公布，至於生仔，就連謠傳都費事澄清，係咪有啲過份呢！
傳真︰2623-9278
電郵︰