蕭正楠（Edwin）噚日喺灣仔藝術中心，出席由now.com.hk舉行嘅獨家放送《現在音樂劇之沙灘排球梳乎厘》首播會，重聯同劇中七位女角玩遊戲。
喺個劇入面，一班女仔着晒沙灘裝，背心短褲加拖鞋圍實Edwin，搞到佢鬼咁心花怒放。但Edwin話由拍劇開始，只係同女主角B女、Isabella最熟，而佢嘅螢幕初吻，就獻咗畀Isabella，但佢哋都冇過電，佢話：「拍接吻戲都唔係好擔心，佢好專業，我為求效果自然唔想NG，點知最後都因為燈光問題NG咗三次。至於成個禮拜入面對住班女仔，我都好叻仔夠定力，冇日久生情。」
另外，Edwin喺首播會之前，喺美孚同一班歌迷打排球，原來佢讀書時打排球好叻，喺校隊重不時贏比賽，好多學妹都託人送情信畀佢，情人節都收到朱古力。不過佢喺中四時，就試過打到手臂骨碎咗，搞到要入院打石膏。
李蘢怡（Tiffany）噚日出席新城電台嘅直播廣播劇《4A生活Teen時暑熱》，Tiffany話最近接拍電影《五個嚇鬼的少年》，噚日亦都係佢第一日開工，Tiffany好開心咁話：「我之前喺《鍾無艷》裏面做臨記，到𠵱家做女主角，片酬都升咗五、六倍喇！」
蔡少芬噚日返電視城，被問到佢好朋友吳啟華同女朋友金巧巧分手，佢就好趣致咁話：「唔係結婚咩！分咗手一次喎！係咪遲啲又喺番埋一齊？」之後所有人都好認真咁同佢講話件事係真，佢就話：「我唔知係真，真係唔好意思，我啱啱喺大陸返嚟，今晚又要走，都唔得閒關心佢。」
劉德華（華仔）噚日十二點半出現機場，原來佢啱啱由北京做完演唱會返港，現場重有幾個忠實fans接機，只見華仔精神唔錯，沿途亦有同fans傾偈。華仔話今日一早又要起程到廣州開工做嘢，遲啲重要去南昌做表演㖭。
高志森將為新加坡監製一部電視劇，叫做《生命天使》，重搵咗陳松伶（松松）做女主角，高志森日前接受新加坡傳媒訪問時，話由於松松曾演過《生命因愛動聽》，認為佢好啱演出呢部勵志劇，加上松松連續幾屆攞咗學生偶像冠軍，相信觀眾應該都會好接受嘅。
麥浚龍（Juno）最近被無綫睇中搵佢拍劇，遲啲Juno重會去試鏡，聽聞Juno早排拍完TVB嘅音樂特輯後，TVB就主動搵佢試鏡，雖然只係初步傾，但都有一定成數。而Juno嘅身材向來瘦削，佢嘅體重都係得一百三十磅，所以佢就食營養粉增肥，點知搞到個人好燥熱，出現輕微便秘，𠵱家佢都冇再食啦。