一連四日的「亞洲國際都會卓越政府」管理研討會花費五百萬，政府請客市民付鈔，受惠者是一萬四千名中高層公僕，計落每人280元，一場咪嘴演唱會的價錢，何必斤斤計較。我建議這類RootMapLearning腦震盪活動月月搞一次，招待三層架構的市民，一齊看圖索驥，發揮磁力共振效果，說不定能將治港班子上晒腦的瘀血，一震一拍佢後尾枕，當堂好番。
不要睇低市民的街坊智慧，考驗中高級公僕的問題，小市民一樣答得妙。例如「過去二十年香港發生過甚麼轉變？」師奶搶答：「蠢人上晒位，衰公上晒大陸包二奶，全香港的蟻上晒身。」問「全球一體化對本港造成甚麼影響？」OL飛身答：「盡地一煲纖體瘦身啦，好似明星咁展覽小平腹與波波球。噢，叫老董喺面珠眼袋位置打下肉毒桿菌針啦。」問「政府應如何改善本港的排名？」輪米阿婆答：「由今日開始，香港唔同別人比，淨係同董特首比咪得咯。」（筆者按：港大最新民調顯示，老董聲望又創歷史新低。要墊他底，除非香港創世紀新低！黑洞新低！星戰新低！）又問「政府應如何增加對商界與旅客的吸引力？」金毛粉腸答：「政府搞多幾間亞視，等誠哥入股！誠哥是商界一哥，無能代替！」（黐脷根的粉腸是想說無人能代替！）吸引遊客呢？粉腸細佬挖住鼻屎答：「入境時串佢哋，如果唔返轉頭來玩，因住斬佢全家！」