羅文去年患上肝癌後，多次傳出病情惡化，昨日羅文接受商台電話訪問時透露，他正接受一個新的化療，肝部腫瘤吸了藥後會腐爛枯死，不過現時覺得自己太瘦，怕上鏡唔靚，所以要增肥十五磅才會見人。
羅文（籮記）去年證實患上肝癌後，至今仍未康復，昨日他接受商台節目《茶煲裏的查篤撑》電話訪問，談及自己的病況。籮記透露正接受化療，並對自己的健康充滿信心。
籮記在電話訪問中表現得精神奕奕，不過聲線與平日不太相同，他說：「𠵱家幾好呀，上次肝嘅腫瘤出咗少少毛病，跟住突然有一個好新嘅醫療法，屬於化療之一，但唔係全身化療，係局部針對個瘤做，打少少藥落個肝度，個腫瘤吸咗啲藥會腐爛枯死，但我唔會甩頭髮，只不過會唔想食嘢同發燒。個人當然會瘦晒，所以我唔想見人住，因為個樣又瘦又唔靚，咪喺屋企休息囉。」
籮記表示當自己的體質恢復後，便會到四川吸取靈氣，陳伯亦預言籮記將於明年康復，籮記說：「陳伯噚日嚟探我，重帶咗好大個菇畀我燉參湯，然後佢話過咗今年就會好。」
籮記為免被傳媒拍到瘦樣，他表示會讓自己增肥十五磅才會與大家見面，他說：「要起碼肥番十五磅，面口圓番啲先同大家見面，因為𠵱家個樣瘦晒，影出嚟唔靚，等我個樣靚番，咁就影個夠囉！」
籮記在家中休養期間，曾多次偷偷溜出街，他說：「我已經偷走出街好多次，好似做賊咁。我成日喺屋企，搞到個人懶咗，我想多啲活動，生肉都快啲啦。」