梁朝偉主演的《無間道》前晚拍外景，在戲中偉仔駕着值八十萬的凌志跑車接載陳慧琳。日前偉仔被張衞健寸好Cool，偉仔前晚說：「我一向都係好Cool。」
陳慧琳與梁朝偉前晚在中環街頭拍攝電影《無間道》，戲中陳慧琳飾演一位心理醫生，病人梁朝偉經常找她傾訴，前晚拍攝偉仔駕着一部價值約八十萬的凌志開篷跑車，接載他的心理醫生陳慧琳去中環。
張衞健早前指劉德華在片場很熱心教他做戲，但梁朝偉卻表現得很cool，前晚記者問偉仔會否介意健仔暗寸他，偉仔說：「佢講吓笑，冇乜所謂，我唔會介意，我一向都係好cool，自己平時都係好少嘢講，大家又唔好畀佢咁大壓力，其實佢唔講又邊度有得笑。」
最近劉德華為官司心情欠佳，但近日梁朝偉與華仔合作拍《無》片，並未察覺華仔有異樣，他說：「華仔心情唔錯，唔覺佢有事。阿B開個唱，我都有去支持，阿B用積極態度去面對人生，作為佢朋友，我梗係支持佢啦！遲吓我都希望自己可以開個人演唱會。」
此外，陳慧琳友情客串演出《無》片，所以片酬亦象徵式收友情價，Kelly說：「我第二次同偉仔合作拍戲，發覺佢比起《東京攻略》嗰陣重有型、靚仔。今日嚟開工作之前，我啱啱去睇完中醫，因為我患感冒，搞到喉嚨好痛，如果繼續開唔到聲，咁禮拜日我去內地表演就好麻煩，所以我希望可以盡快醫好個病。」