下半年青山公路率先展開新盤大戰，發展商開盤前都有車輪式宣傳攻勢，九龍倉（004）嘅深井碧堤半島，前日先向代理推銷秘密武器之一嘅風水，噚日就披露物業位置圖，配合風水陣，買家就可以好容易搵到心水單位。
九倉黃光耀話，今年先賣碧堤半島六、七座，明年初推八、九座。蘭西從位置圖所見，率先推出市場嘅四座物業，最近青山公路嘅係E、F、G及H室兩房細單位，面積六百至八百方呎，望山景；A、B、C、D室三房單位，面積一千至一千一百方呎，屬向海單位，青馬大橋及珀麗灣盡入眼簾。屋苑嘅左邊青龍位（青衣島），右邊白虎位（大嶼山），同前面玉帶環腰嘅青馬橋，全部展示晒出嚟。
黃光耀透露，碧堤半島有四款示範單位示，重要等多一星期至搞掂，至於幾時發售，就要時間配合。而代理美聯就話，計劃用二百萬元宣傳碧堤，嚟緊一個月嘅周六日以花車巡遊吸客。
馬灣珀麗灣開售後釋放嘅購買力，成為各發展商爭奪對象，究竟點樣先可吸引到呢批客買自己個盤，最簡單當然係減價啦！所以近期開售嘅新盤，發展商都開晒聲話低價賣樓，同時盡量搵埋代理幫手。但係咁多個盤，個個都咁做，咪又冇晒優勢？
部份發展商見代理有好多珀麗灣向隅客喺手，就打代理主意，畀個盤佢哋做獨家，等經紀說批客轉投自己個盤。而代理行間瓣瓣都鬥，攞到獨家點都會搏命促銷，免得俾對手笑到面黃，發展商就借助代理行間嘅矛盾，從中得益。但係咪個個盤都可以用呢招就好難講。
人氣電視節目百萬富翁，製造唔少小富翁，最近重製造埋小業主㖭。泰平（香港）有限公司贊助7及8月嘅百萬富翁節目，送出東莞樟木頭碧河花園水雲天一座價值三十二萬八嘅洋房，得主係喺7月29號（第六集）攞到五十萬分嘅張港林。
電視台喺上個禮拜六預錄頒獎，由主持陳啟泰同泰平副總經理李兆佳頒獎，將會喺今晚出街，因為是預錄，所以蘭西可以早過佢公開頒獎場面。
講番水雲天呢個盤，六月份以「全樟木頭唯一擁有一百八十度全河景及九十萬呎生態公園物業」做宣傳，至今賣咗超過四百五十個單位。
鰂魚涌太古城咁大個屋苑造價最高係海天花園，但最近都守唔住個價，中原太古城分行經理趙鴻運透露，富天閣低層E室，向內園，876方呎，成交價只係260萬，每呎2968蚊，比市價低7%。
原業主係內地人，九五年用五百一十萬買入自住，九九年轉為出租，可能睇唔好後市，約滿後平啲都甩手，埋單計數帳面蝕二百五十萬。
蘭西睇番啲成交，海天花園呎價一般都要三千幾蚊，近期只有6月見過景天閣二十三樓A室，708方呎，以二百萬賣咗，呎價2825。睇嚟後市難樂觀。
正當全城視線由珀麗灣轉移至青山公路之際，利記就另闢新戰線，明日起一連三日，喺將軍澳坑口站租咗個攤位搞展覽，叫做「利嘉閣呈獻將軍澳新面貌」，主要係講解該區整體規劃，介紹區內新樓盤，同場有專人為市民解答有關按揭同估價等問題。攤位30幾呎，估計連埋其他費用夾埋要四萬蚊。
蘭西
電郵地址：