早前阿董被批評大細超，同一日只肯收北京火警遇難女學生家屬嘅請願信，爭取居港權嘅女學生張小萍遞信就唔理，擺明歧視爭取居港權人士。噚日政府新聞處長蔡瑩璧就親自解釋，話係一場誤會。
佢話前日一大清早就開車去到特首住所嘉慧園，接阿董出席粵港台三地研討會，開完會返到上車，接到消息，話北京火警遇難者家屬想遞請願信，即問過阿董。特首就表示想親自接信，所以成事。但蔡處長就話唔知張小萍幾時去過特首辦，話係大細超真係冤哉枉也。不過有一樣規矩大家要知，就係每一次接唔接信，都係特首親自決定。
（圖）前日爭取居港權嘅女學生張小萍遞信只由阿sir代收。
傳真︰2623-9278
電郵︰