受美股下跌拖累，港股第4日回落，恒指再挫55點，4日加埋唔見294點。昨日最低時恒指報10070，收10130，睇嚟1萬點會守得好穩。
恒指Call輪跌幅唔大，今日期指結算後大市有機會做番好啲，可以諗吓收啲恒指Call輪，對象係9408，明年1月到期，交投算旺，但比唔上9406，不過數據靚過9406。
油價新高，但啲油股唔係隻隻得，中石油（857）收1.57元，跌2仙，6件中石油Call輪件件跌。明年3月前夠鐘嘅Call輪，全部有負溢價，最大嘅係9070，現價27仙，負溢價3.1%，槓桿率5.8倍。油價高企，大概預咗唔會頂得好耐，所以油股跌定等，再跌機會唔大，9070值得小敲，希望負溢價縮番。中石油Call輪明年3月以後到期嗰批，溢價過高，其中7月夠鐘嘅9381，溢價21%，買呢件輸多贏少。
國泰航空（293）冇因油價上升而下跌，收11.80元，升1格。國泰較早前派半年成績表，市場叫好。近期傾緊喺內地嘅飛行權，一旦有結果，股價會飛多一飛。國泰Call輪有兩件，得件9140有成交，但亦唔夠1球，可細注小敲。
章 盛