華脈無線通信（499）全年業績一再延遲公布，終於係虧損9700萬元。經紀陳話，市場傳聞華脈可能會賣殼，而收購價會高過現時市價。
坊間傳咗好耐，話華脈會有得炒，雖然股價一度炒上12仙樓上，但好快就回落，小初睇過盤路，覺得沽壓唔細，睇嚟街貨相當多。隻股噚日微升1.9%，收10.7仙，成交金額唔夠300萬元。
經紀陳話，新買家身份又係大陸客，但會唔會全面收購，令小股東可以受惠，暫時尚未知道，雖然華脈大股東家陣持股量高過30%，但𠵱家啲人買殼，邊有話輕易提全購咁疏爽，就算係有，個價都唔慌好，所以華脈炒賣殼呢單料，小初都係聽住先。
另外，日前小初提過嘅宜進利（304），股價繼續升，噚日最高見過25.5仙，收24.6仙，又係微升2%。
經紀黃話，聽聞供股包銷上咗身嘅朋友，已經準備沽貨收割。
慕容小初