美國紐約州檢察官EliotSpitzer調查花旗集團行政總裁韋爾（SandyWeill）是否曾示意花旗屬下嘅所羅門美邦嘅明星分析員JackGrubman，將AT&T嘅投資評級調高。呢單嘢之惹人注目，唔係因為Grubman，而係韋爾喺華爾街位高權重，數十年來屹立不倒，史必沙調查佢，直情係打大老虎，假若俾史必沙搞掂，實係全球頭條新聞。
韋爾四十幾年前在紐約開創小型經紀行，既workhard，又worksmart，透過經驗學習，不斷收購合併，一路壯大：八十年代初，佢將Shearson與美國運通合併，以為威盡一時，點知遇上滑鐵盧，被迫離開合併後嘅運通，以為玩完啦，誰知唔係，佢休養生息之後，不久就收購另外一間財務公司，之後併購華裔投資專家蔡至京﹙GeroldTsai，六十年代華爾街神童）控制嘅Primerica，再買Travellers美邦，所羅門兄弟……終極之戰乃係將佢控制嘅公司與萬國寶通合併，組成花旗集團，冇幾耐萬國寶通主席退位，韋爾獨攬大權，威盡全世界。二十年前逼佢離開運通嗰位JamesRobinson呢？怕冇乜人記得咯，都唔知走咗去邊，今日嘅花旗真叻過運通多多聲啦。咁嘅人物，會唔會陰溝翻船，七十歲之前從珠穆朗瑪峯跌落地下？
史必沙夠膽挑戰佢，真巴閉，史必沙嘅勝算，唔知英國博彩公司有冇盤口開出嚟呢？