張東琳、陳曉東（東東）、繆非臨同方子璇，前晚喺尖沙嘴港威戲院出席新片《停不了的愛》首映。張東琳前晚打扮性感，對於上海富商周正毅同陳雅倫傳緋聞，佢話：「我見過佢哋兩個同成班朋友喺上海的士高玩，但佢哋係乜嘢關係就唔知。」
身為男主角嘅東東前晚請咗唔少朋友到場睇戲，問東東有冇請戴思聰老師？佢冷笑兩聲：「哈哈！」然後佢話：「唔知呢，有機會見到咪請佢嚟。」戴思聰個女戴辛尉曾經形容東東同佢爸爸嘅交往係「神交」，東東話：「『神交』咗八年，我好了解佢，我明白大家點解要咁問，真係冇嘢。」
東東可有留意舊愛張栢芝近日紋身？佢話：「栢芝嘅紋身都係佢嘅個人喜好，如果第日有人要紋我個名喺身，我都唔可以唔畀。」
此外，東東嘅經理人文雋話呢套片嘅女主角秦海璐缺席，因為佢喺內地拍電視劇《誰都會說我愛你》時患咗紅眼症，所以要休息吓。
下周四上映嘅電影《office有鬼》有一張宣傳海報係莫文蔚、陳小春、舒淇同馮德倫等吊頸嘅場面，俾電檢處禁咗，所以唔可以喺地鐵、隧道口同埋巴士張貼，因為張海報太恐怖，怕嚇親啲喺辦公室返工嘅人。
電影公司方面話印呢張海報前都做過街訪，市民都話覺得有啲陰森恐怖，佢哋亦唔會再印新海報。
前排有雜誌偷影到名模Rosemary同男友Gordan嘅親熱相，噚日Gordan喺金鐘行騷時話：「嗰度係我哋屋企，佢哋咁做好侵犯人嘅私隱，好影響Rosemary嘅形象。我同Rosemary拍拖，所做嘅嘢都係一般男女朋友會做嘅嘢啫。」
薛家燕（好姨）、陳彥行、趙學而，廖碧兒、林文龍、鄧兆尊同劉愷威等無綫劇集《皆大歡喜》嘅演員，前晚喺灣仔為新城台慶表演綵排，但喺演員名單上淨係冇梅小惠個名，早前有傳梅小惠同《皆》劇演員不和，問好姨今次點解冇小惠份？好姨話：「唔係因為乜嘢是是非非，咁啱佢撞咗期啫。」
女藝人出賣自己，換嚟榮華富貴，呢啲嘢喺娛樂圈係等閒事，不過做到好似排骨女星咁出面，就真係好少有。
排骨女星早排搭上咗個有婦之夫，扮晒純情咁話同人講心唔講金，其實再之前，佢真正有興趣嘅係城中富豪。排骨女星都咪話唔犀利，試過喺一個星期之內，富豪有份出席嗰三個飯局，佢都自動蒲頭，不過富豪對佢冇興趣，所以佢再積極都冇用。
由沈殿霞（肥姐）同王賢誌主持嘅無綫節目《登堂入室歎世界》，主要介紹香港及外地嘅豪宅，佢哋噚日喺電視城為節目錄影。
王賢誌啱啱喺加拿大返港，噚日特意送咗一份神秘禮物畀肥姐，肥姐即講笑咁話：「得你知道我着乜嘢size，多謝你送我呢份貼身享受。」