如果雲尼斯達羅唔係咁「自私」，睇怕科倫可以射入佢喺曼聯嘅「第一球」。
喺前晚曼聯對沙勒格斯基場歐冠盃，當前者贏到三球，雲尼斯達羅就博到球十二碼。科倫見自己踢咗曼聯成七個月都未開齋嘅，走上前諗住做劊子手，以作出零的突破；點知雲尼斯達羅一啲面都唔畀佢，重一腳將個波送入網。結果係點，雲尼斯達羅入咗兩粒，而科倫就得個桔，又一次食白果。
科倫喺今屆世界盃證明咗，佢係個唔錯嘅前鋒，不過喺曼聯就欠啲運，遲遲都未入到波，所以連領隊費格遜都戥佢心急，希望佢可以快啲開齋。
老實講，雲尼斯達羅身為前鋒球員，想攞多啲入球，都係一件好正常嘅事，之但係，有時都應該大方啲，畀啲機會其他球員。家陣科倫想開齋，惟有寄望禮拜六場超聯啦！
馬拉當拿踢波醒就係人都知，而佢最近重走去學人唱歌，更錄咗一張唱片，以鼓勵患病嘅阿根廷兒童。呢位前阿根廷國腳近年負面新聞多都數唔晒，又打人又吸毒，而𠵱家重喺古巴接受戒毒治療，真係希望佢今次為阿國兒童做番啲嘢，可以幫佢挽回番啲形象。
早排因為錯入球證廁所而俾英足總罰一萬鎊（約十二萬港紙）嘅伯明翰中場沙維治，話罰款太過唔合理同過重，所以經已提出上訴。講真呀，我求大俠都認為沙維治咁做好啱，事關佢又唔係喺場上打人或其他壞事，只係違反咗啲無傷大雅嘅規則，似乎唔使接受咁重懲罰。
相信唔少球迷都透過「收錢台」睇過孫繼海喺英超聯嘅表現，李鐵就未喺電視直播出現過。之不過，兩位中國球員分別效力嘅曼城同愛華頓喺禮拜六碰頭，聽講「收錢台」特別將原先直播美國網球公開賽節目延遲，改直播呢場賽事，等中國內地同香港球迷都可以即時收睇，話晒都係英超第一次有兩個中國球員對壘，我求大俠都要讚「收錢台」一句：醒目！
一級方程式車手韋蘭諾夫拒絕咗CART賽車畀佢嘅五千萬美元三年合約，原因係佢認為自己喺F1可以賺到更多錢，但呢位加拿大車手唔好唔記得，最近佢嘅英美車隊老細先呻韋蘭諾夫嘅薪水太高，同佢嘅表現唔係咁相稱，繼我求大俠話，韋蘭諾夫近年喺F1可謂死氣沉沉，倒不如轉賽其他賽車啦，而且五千萬美元已經好好㗎啦！